Áıel adamdy ajaldan aman alyp qalǵan ShQO shekarashylary «Epligi úshin» medaldarymen marapattaldy
ASTANA. 10 maýsym. QazAqparat - QR UQK Shekara qyzmetiniń «Soltústik» aımaqtyq basqarmasy Óskemen shekara otrıady «Oba» shekara zastavasynyń eki áskerı qyzmetkeri áıel adamnyń ómirin qutqaryp qaldy. Kórsetken erjúrektigi úshin kelisim-shart boıynsha qyzmet etetin serjant Qaıyrbek Tóleýov jáne kelisim-shart boıynsha qyzmet etetin kishi serjant Beıbit Tolyqbaev «Epligi úshin» medaldarymen marapattaldy.
Bul týraly vedomstvonyń baspasóz qyzmetinen habarlaıdy.
Áskerı qyzmetkerler túnde «saǵattyq shekara» narıadynan qaıtyp kele jatqan. Shyǵys Qazaqstan oblysy Shemonaıha aýdany Medvedka aýyly kósheleriniń birinen olar órtenip jatqan úıdi kóredi. Bul týraly radıostantsııa arqyly shekara zastavasy boıynsha kezekshige habarlap, oǵan órt sóndirýshiler men medıtsına qyzmetkerlerin shaqyrý mindetin júktep, er azamattar oqıǵa ornyna tap bergen. Іshinen jabylǵan syrtqy esikti olar ońaı ashyp kirgen. Tútinge oranǵan bólmeniń edeninde esinen tanyp qalǵan egde jastaǵy áıel jatqan. Órt aǵash tasany jáne jıhazdy sharpyǵan, ilgishte ilýli turǵan syrt kıim byqsyp, bólmede aýa qalmaǵan. Shekarashylar áıeldiń esin jııýyna kómektesip jatqanda, olardyń kıimderi órtene bastaǵan. Beıbit tútin toly asúıde úlken gaz ballony turǵanyn baıqaǵan. Olar zardap shekken áıeldi kóterip alyp, dalaǵa alyp shyqqan. Bir-eki mınýttan soń kúshti jarylys bolyp, úı ishi túgeldeı otqa orandy. Órt sóndirýshiler men medıtsına qyzmetkerleri kelgende odan tek kúl qaldy.
Qazaqstan Respýblıkasy Ulttyq qaýipsizdik komıtetiniń Ortalyq apparatynda erjúrek shekarashylarǵa el Prezıdenti - QR Qarýly kúshteri Joǵarǵy bas qolbasshysynyń atynan Qaıyrbek Tóleýovke jáne Beıbit Tolykbaevqa «Epligi úshin» medaldary tapsyryldy.
Búginde aıbyndy shekara kúzetshileri «Oba» shekara zastavasynda qyzmetterin óteýdi jalǵastyrýda.
