Aıdyn Aıymbetov týǵan kúnin Juldyzdy qalashyqta atap ótedi
Aıdyn 1972 jyly 27 shildede Taldyqorǵan oblysy Taldyqorǵan aýdanynyń Zarıa Kommýnızma (qazirgi Ótenaı) aýylynda týǵan.
1989 jyly Taldyqorǵan qalasyndaǵy №20 mektepti altyn medalmen bitirgen. 1993 jyly Armavırdegi joǵarǵy áskerı avıatsııalyq ýchılışeni "joıýshy-ushqysh" mamandyǵy boıynsha aıaqtady.
1993 jyldyń mamyrynan Qazaqstannyń Qarýly Kúshteriniń qatarynda qyzmet atqarady. Joıýshy-ushqysh. Ǵaryshkerler jasaǵyna tańdaý aldynda Taldyqorǵan qalasy mańyndaǵy avıabazada avıatsııalyq bólimsheniń komandıri bolyp qyzmet atqardy. 2009 jyldyń jeltoqsanynan Qazaqstan Respýblıkasynyń Ulttyq ǵarysh agenttigi tóraǵasynyń keńesshisi, agenttik departmentiniń dırektory. 2011 jyldyń naýryzynan Sultanǵazıev atyndaǵy ǵaryshtyq zertteýler ınstıtýtynda ǵaryshtyq tehnologııalardy aqparattyq-bilimdik qamtamasyz etý bóliminiń bastyǵy. 2012 jyldyń kókteminen Astana qalasyndaǵy Oqýshylar saraıyndaǵy jas ǵaryshkerler mektebinde ustazdyq etedi.
1993 jyly ǵaryshkerlikke alǵash ret ótinish berdi. Ekinshi márte 2001 jyldyń 5 mamyrynda qaıta berdi. 2002 jyly Reseı-Qazaqstan memleketaralyq birlesken ǵaryshqa ushý kelisimi aıasynda Máskeý qalasynda medıtsınalyq komıssııadan ótti. 09.11.2002 jylǵy Qazaqstan Respýblıkasy Úkimeti janyndaǵy vedomstvoaralyq komıssııa májilisinde Qazaqstan Respýblıkasy ǵaryshkerleri otrıadyna kirgizý týraly usynys jasaldy. 12.10.2012 jylǵy Qazaqstan Respýblıkasy Úkimetiniń №1304 qaýlysy negizinde Qazaqstan Respýblıkasynyń ǵaryshkeri dárejesi berildi.
Aıdynnyń anasy Jumaǵul 67 jasta, zeınet demalysynda. Aıdynnyń eki aǵasy men ápkesi bar.
Jubaıynyń esimi - Lılııa. Úsh balasy bar: 17 jastaǵy uly Ámir, 2 qyzy - 14 jastaǵy Dıana men 8 jastaǵy Daıana.
26.05.2015 jyly Qazǵarysh baspasóz hatshysy Erbol Dáýletov 2015 jyly ǵaryshker Aıdyn Aıymbetovti brıtandyq ánshiniń ornyna 2015 jyldyń qyrkúıeginde ǵaryshqa jiberý týraly máseleni talqylap jatqandyǵyn habarlady.
Reseı men Qazaqstan arasyndaǵy kelisimge sáıkes A.Aıymbetov 2015 jyldyń mamyrynyń sońynan Gagarın atyndaǵy Ǵaryshkerlerdi daıyndaý ortalyǵynda daıyndyqtan ótip jatyr. 20 - 27 maýsym aralyǵynda ol amerıkandyq HǴS segmentin zertteý maqsatynda Hıýstondaǵy (AQSh) Djonson atyndaǵy NASA Ǵarysh ortalyǵynda boldy. Qazir kestege sáıkes Ǵaryshkerlerdi daıyndaý ortalyǵynda ushý aldyndaǵy daıyndyqtan ótip jatyr.
Quramynda qazaqstandyq ǵaryshker bar ekspedıtsııany Baıqońyr ǵarysh aılaǵynan 2015 jyly 2 qyrkúıekte Astana ýaqytymen saǵat 10:30 HǴS-qa ushyrý kózdelgen.
