Aıdyn Aıymbetov: Ómirde qol jetkizgen jetistikterim - ustazdarymnyń arqasy (FOTO, VIDEO)

ASTANA. QazAqparat - Búgin qazaq ǵaryshkeri, Halyq Qaharmany Aıdyn Aıymbetov QR Qarýly kúshteri Áýe-qorǵanys kúshteriniń áskerı-áýe ushqyshtarymen kezdesip, Áýe-qorǵanys kúshteriniń ǵaryshqa baryp kelgen týyn jas ushqyshtarǵa tabys etti.

«Eń aldymen, árıne, úshinshi qazaq ǵaryshkeriniń samǵaýyna jaǵdaı jasaǵan Joǵarǵy Bas qolbasshysy - Memleket basshysy Nursultan Nazarbaevqa alǵysym zor. Men bul oqıǵaǵa 1998 jyldan beri daıyndaldym. Jalpy, men ómirde nege qol jetkizsem de ol - ustazdarym men tálimgerlerimniń arqasy. Kezinde, ýchılışede oqyp júrgenimizde Toqtar Ońǵarbaıulynyń (Qazaqstan Respýblıkasynyń Halyq Qaharmany) ushyp-qonǵanyn kórgen edik, keıin bul kisi meniń ómirlik ustazyma aınaldy. Bul adam meniń ushqysh retinde qalyptasýyma kóp yqpal etken adam», - deıdi A.Aıymbetov. Kezdesý barysynda QR áýe qorǵanys kúshteriniń bas qolbasshysy, avıatsııa general-maıory Nurlan Ormanbetov Halyq Qaharmany Aıdyn Aıymbetovke QR Áýe qorǵanys kúshteriniń tósbelgisin tabys etti. Esterińizge sala keteıik, 2015 jyldyń 2 qyrkúıeginde «Baıqońyr» ǵarysh aılaǵynan táýelsiz Qazaqstannyń tuńǵysh ǵaryshkeri Aıdyn Aıymbetov «Soıýz TMA-18M» raketasymen ǵaryshqa ushqan bolatyn. Aıdyn Aıymbetov ǵaryshta 9 kún 20 saǵat boldy.