Aıdyn Aıymbetov qyzmetin «Qazǵaryshta» jalǵastyrady

ASTANA. QazAqparat - Aıdyn Aıymbetov ońaltý sharalarynan keıin qyzmetin «Qazǵaryshta» jalǵastyrady. Bul týraly ǵaryshker búgin Astanada ótken «Patrıottar» forýmynda málim etti.

«Jerge qoný Jezqazǵannan alys emes jerde 12 qyrkúıek kúni oryn aldy. Keıin biz Ǵaryshkerlerdi daıarlaý ortalyǵynda ońaltý sharalarynan óttik. Búgin Qazaqstan patrıottary forýmyna qatysý úshin kelip otyrmyn. Ońaltý sharalary 9 qazanda, ǵaryshkerlerdiń kezdesýinen keıin aıaqtalady. Sodan soń men Qazaqstanǵa oralyp, «Qazǵarysh» kompanııasynda óz qyzmetimdi jalǵastyramyn», - dep atap ótti ol.

Aıdyn Aıymbetovtiń sózine qaraǵanda, ǵaryshqa sapardyń tolyq ǵylymı nátıjelerin Qazǵarysh agenttiginiń resmı saıtynan alýǵa bolady.

Forým jaıynda toqtalǵan ǵaryshker mundaı sharalardyń mańyzdy ekendigin erekshe atap ótti.

«Forýmdar aramyzda qarapaıym ómir súrip júrse de, kúndelikti uly ister jasap júrgen batyrlarymyzdy ulyqtaýǵa baǵyttalǵan», - deıdi ol.

A.Aıymbetovtiń aıtýynsha, ǵaryshqa jasaǵan sapary ol úshin qarapaıym isterdiń biri. «Ol meniń jumysym, ınjener mamanyna tıesili qyzmet. Iá, úlken fızıkalyq aýyrtpalyqtar, úlken eńbek talap etedi, biraq tıisti jattyǵýdan ótse, kez kelgen qarapaıym adam jasaı alatyn is», - dedi ǵaryshker.

«Men óz elim úshin ómirimdi qııýǵa, barsha ómirimdi óz elimniń damýy men kórkeıýine berýge daıarmyn», - dep túıdi sózin A.Aıymbetov.