Aıdyn Aıymbetov QR Áskerı-áýe kúshteriniń týyn ǵaryshqa alyp ushady (FOTO)

ASTANA. QazAqparat - Qazaqstandyq ǵaryshker Aıdyn Aıymbetov Qazaqstan Respýblıkasy Qarýly Kúshteri Áskerı-áýe kúshteriniń týyn óziniń ǵaryshqa alǵashqy saparynda ózimen birge alyp ushady. Tý onyń qazaqstandyq armııadaǵy ushý mansabynyń bastamasy jáne ańsaǵan armany - ǵaryshqa ushýǵa qol jetkizgenin aıqyndaıtyn belgi bolyp tabylady.

Bul týraly QR QM baspasóz qyzmeti habarlady.

Qazirgi kezde Qazaqstannyń Áýe qorǵanysy kúshteri bas qolbasshylyǵy basqarmasynyń ókilderi arqyly Áskerı-áýe kúshteriniń týy ǵaryshkerge berildi.

Aıdyn Aıymbetov 1993 jyly «ushqysh-ınjener» mamandyǵyn alǵannan keıin QR QK Áýe qorǵanysy kúshterine qarasty 21751 áskerı bóliminde qyzmet atqaryp, MıG-23 jáne L-39 ushaqtarynda ushýlardy oryndady.

2002 jyly ushqysh Qazaqstandyq ǵaryshkerlerdiń jasaǵyna engizýge usynylǵan bolatyn. Ol ǵaryshkerlikke úmitkerler tobynyń quramynda daıarlyqqa kiristi. Úsh jyldan soń «ǵaryshker-synaýshy» biliktiligin aldy. 2014 jyly oǵan «QR ÁÁK polkovnıgi» áskerı ataǵy berildi.

Aldaǵy «Soıýz TMA-18 M» ushý kemesinde ǵaryshqa ushý aǵymdaǵy jyly qyrkúıektiń basyna josparlanyp otyr. Aıdyn Aıymbetov ǵaryshker Sergeı Volkov (Reseı ǵaryshy) jáne astronavt Andreas Mogensenmen (Eýropa ǵarysh agenttigi) birge Halyqaralyq ǵarysh stantsııasyna jiberiledi.