Aıdyn Aıymbetov ǵaryshqa Qazaqstannyń kók baıraǵyn alyp ushady
«Bıyl Qazaq handyǵynyń qurylǵanyna 550 jyl tolady. Elimizdegi ultaralyq tatýlyq pen beıbitshilikti saqtaýda negizgi uıym bolyp sanalatyn Qazaqstan halqy Assambleıasyna 20 jyl, sondaı-aq Konstıtýtsııanyń qabyldanǵanyna da 20 jyl tolyp otyr. Osy oraıda men mereıli merekelerge baılanysty Qazaq handyǵynyń 550 jyldyǵy men QHA 20 jyldyǵyna arnalǵan týlardy jáne elimizdiń kók baıraǵyn ǵaryshqa alyp ushamyn», - dedi ǵaryshker. Sonymen qatar Aıdynnyń kenje qyzy Daıana ákesine ózi jaqsy kóretin oıynshyǵyn tartý etken, dep jazady «Egemen Qazaqstan». «Ózim óte qatty jaqsy kóretin oıynshyǵymdy ákeme syıladym. Ǵarysh saparyna aman-esen baryp kelýin tileımin. Bolashaqta men de ǵaryshker bolsam dep armandaımyn», - deıdi Daıana.
Osyǵan deıin habarlaǵanymyzdaı , quramynda qazaqstandyq ǵaryshker Aıdyn Aıymbetov bar HǴS attanatyn ekspedıtsııasymen «Soıýz TMA-18M» basqarylatyn korablin ushyrý 2 qyrkúıekte Baıqońyr ǵarysh aılaǵynyń Gagarın alańynan Astana ýaqyty boıynsha saǵat 10.37-de josparlanǵan. Sondaı-aq Aıdyn Aıymbetov ǵaryshta ulttyq taǵamdarmen tamaqtanady.
