Aıdyn Aıymbetov «Almaty oblysynyń Qurmetti azamaty» atandy
TALDYQORǴAN. QazAqparat - Búgin oblys ákimi Amandyq Batalov 65 adamǵa memlekettik nagrada jáne 7 adamǵa «Almaty oblysynyń Qurmetti azamaty» ataǵyn tapsyrdy, dep habarlaıdy QazAqparat tilshisi.
Táýelsizdik kúnine arnalǵan saltanatty jıyn barysynda óńirdegi ónerkásip, agrarlyq sala, densaýlyq saqtaý, bilim berý, kásipkerlik, sport jáne áleýmettik qyzmet kórsetý salalarynyń úzdik mamandaryna uzaq jylǵy eńbegi men jemisti qyzmeti úshin «Parasat», «Qurmet», III dárejeli «Eńbek dańqy» ordenderi, «Eren eńbegi úshin», «Shapaǵat» medaldary, Qazaqstan Respýblıkasynyń Qurmet gramotasy, «Almaty oblysynyń Qurmetti azamaty» ataǵy berildi. Olardyń qatarynda belgili metsenat Baýyrjan Ospanov «Parasat» ordenimen, Almaty oblysy ákiminiń orynbasary Jaqsylyq Omar jáne oblystyq dene shynyqtyrý jəne sport basqarmasynyń basshysy Turatbek Charapıev «Qurmet» ordenimen marapattalsa, «Qazaqstannyń 100 jańa esimine» engen Eldos Baıalyshbaev «Shapaǵat» medalin ıelendi. Al Jetisý jeriniń týmasy, úshinshi qazaq ǵaryshkeri Aıdyn Aıymbetov «Almaty oblysynyń Qurmetti azamaty» atandy.
Nagrada alǵandar atynan «Núsipov jáne K» JShS dırektory Qanathan Núsipov pen «Suńqar Almaty» qus fabrıkasynyń bas dırektory Dmıtrıı Chalyh sóz sóılep, óz quttyqtaýlaryn jetkizdi. Saltanatty jıyn sońy kontserttik baǵdarlamaǵa ulasty.
