Aıdos Sarym: Jańa qujatta beıbit sherýdi uıymdastyrýshylardyń mindetteri aıqyndalǵan
ALMATY. QazAqparat – Almatyda QR Aqparat jáne qoǵamdyq damý mınıstri Dáýren Abaevtyń qatysýymen «Qazaqstan Respýblıkasynda beıbit jınalystar, sherý, pıketter, demonstratsııalyq jınalystardy ótkizý men uıymdastyrý tártibi týraly» jańa zań jobasy qoǵamdyq keńeste talqylandy, dep habarlaıdy QazAqparat tilshisi.
Otyrysqa qatysqan sarapshylar jańa zań jobasy týraly oılaryn bildirdi.
Saıasattanýshy Aıdos Sarym buǵan deıingi eski zańdy ózgertý qajettigi týǵandyǵyn aıtty.
«Osy kezge deıingi 1995 jylǵy zańda aktsııalar, beıbit sherýler degenniń eshbir túri, túsi degen bolmaıtyn. Pıketke shyqsa da, basqaǵa shyqsa da 100 adam, 5000 adam shyqsa da barlyǵy birdeı sıpattalatyn. Osy oraıda zań shyǵarý organdaryna bergen usynysta osy máseleni ádeıi tizdik. Ekinshi másele, qazirgi jańa zańda 250 adam qatysatyn dúnıelerge arnaıy ruqsat suraý qajet joq. Bizdiń qazirgi qoǵamdyq dıskýssııa, daý-damaıdyń bári sol 1-2 sózdiń aınalasynda tur. Ruqsat berý degen sııaqty. Negizi bul zańdyq daý emes, saıası daý sııaqty», - dedi ol.
Saıasattanýshy jańa zańda beıbit sherýlerge qatysty uıymdastyrýshylardyń, qatysýshylardyń mindetteri men quqyqtary aıqyndala túskenin aıtty.
«Zańdy talqylaǵan kezde QR ІІM, jergilikti maslıhattardyń taǵy basqa organdardyń jumysy rettelýi tıis. Bolashaqta mıtıng uıymdastyrý úırenshikti nársege aınalady. «Oıbaı, anaý mıtıng ótkizipti» dep tań qalmaıtyn bolamyz, óıtkeni ony ekiniń biri ótkizetin bolady», - dedi ol.
