Aıdos Sarym Ulttyq qoǵamdyq senim keńesiniń qurylýyna qatysty pikir bildirdi
Eske salaıyq, búgin 12 maýsymda Nur-Sultan qalasynda ótken ınaýgýratsııadan keıin sóz sóılegen Memleket basshysy Ulttyq qoǵamdyq senim keńesin qurý týraly josparyn aıtqan edi. Sondaı-aq, Prezıdent atalǵan Keńesti qurý týraly Jarlyqqa qol qoıdy, dep habarlaıdy QazAqparat tilshisi.
«Jalpy, bul keńeske júkteletin mindetterdiń iske asýy birqatar qadamdarǵa baılanysty. Eń aldymen, Keńes erejesin durys bekitip, sodan keıin, onyń quramynyń aýqymdy bolýy, ıaǵnı qoǵamnyń árbir salasynda júrgen ár kúshterdiń atynan shyqqan azamattardyń basyn qosa bilý mańyzdy. Sol keńeske qoǵamǵa sózi ótetin azamattardyń kóptep enip, olar bir-birine qurmetpen qaraı otyryp, tıisti sheshimderdi shyǵarýǵa qaýqarly bolýy kerek. Jumystyń tabysty bolýy kóbine osyǵan baılanysty», - dedi saıasattanýshy.
Onyń aıtýynsha, keńes quramyna engen músheler qoǵamdaǵy eń ózekti máselelerge nazar aýdaryp, der kezinde talqylaı bilýi shart.
«Ekinshiden, keńes ózekti ári negizgi máselelerdi ortaǵa salyp, sol boıynsha tısti qujattardyń nusqasyn, jobasyn shyǵara alatyn uıym bolýy qajet dep esepteı alamyn. Saılaý, BAQ, mıtıngter týraly, sondaı-aq saıası partııalar men qoǵamdyq birlestikter jónindegi zańnamanyń qaıta qaralýyn kópten beri aıtyp júrgender bar. Eger osylardyń negizgi tujyrymdamasyn, negizgi ıdeıasyn bekitip, sony zańgerlerge tabystap, durys nusqalaryn jasap, ony Parlamentke engizse, onda Ulttyq qoǵamdyq senim keńesi ózine júktelgen mindetti oryndaı alady degen pikirdemin», - dedi Aıdos Sarym.
Saıasattanýshynyń paıymynsha, saılaý naýqanynyń aıaqtalýyna baılanysty negizgi emotsııalar taraǵannan keıin, qoǵammen sóılesý, qoǵamdyq-saıası kúshtermen aqyldasý, keńesý jumystary júrgizilýi kerek. Sosyn Prezıdent bastama jasap otyrǵan keńeske kóptegen bilikti azamattardyń kelýin qamtamasyz etken jón.
«Qoǵamda tanylǵan, bedeldi azamattardyń birlese jumys isteýine alǵysharttar jasaý, senimdi orta qalyptastyrý mańyzdy», - dedi A. Sarym.
Budan buryn habarlanǵandaı, búgin ulyqtaý rásiminda Prezıdent Qasym-Jomart Toqaev Ulttyq qoǵamdyq senim keńesin qurýdy kózdep otyrǵanyn málim etti.
«Men Ulttyq qoǵamdyq senim keńesin qurý jón dep sheshtim. Onyń quramyna barlyq birlestik ókilderi men jastar enedi. Ulttyq qoǵamdyq senim keńesiniń alǵashqy otyrysy osy jyldyń tamyz aıynda ótedi. Bılik halyqqa bergen barlyq ýádesin oryndaýy tıis», - dedi Qasym-Jomart Toqaev elordadaǵy ulyqtaý rásiminde.
