Aıdos Sarym: Úgit-nasıhat barysynda kandıdattar óz sózderin ashyq aıtyp, úgitteýge múmkindik aldy
«Úgit-nasıhat júrgizý naýqany birneshe kezeńnen turatyny anyq. Qazir tirkelý úderisi aıaqtalyp, úgit-nasıhat júrgizý jumystary bastalyp ketti. Úgit-nasıhat barysynda kandıdattar óz sózderin ashyq aıtyp, halyqty ózderine daýys berýge úgitteýge múmkindik aldy. Osy kezeńge deıin kórip otyrǵanymyz: ishterindegi eń belsendisi - Qasym-Jomart Toqaevtyń respýblıkalyq shtaby. Onyń bólimsheleri búkil aımaq-aýdandarda qurylyp jatqanyn estip jatyrmyz. Jalǵyz ǵana bılbord ilýden ǵana alǵa shyqty dep aıtýǵa bolady. Almaty qalasynda kórip júrgenim: árbir kandıdattyń shama-sharqynsha bılbordtary ilingen sııaqty. Áli de bolsa, biraq shtabtardyń jumysynda kidirý bar sekildi. Sebebi, keıbir shtabtar stendterge kandıdatynyń ómirbaıany nemese basqa da málimetterdi ýaqytynda ilip úlgermepti», - deıdi Aıdos Sarym.
Saıasattanýshynyń aıtýyna qaraǵanda, ınternettegi belsendilikte de Qasym-Jomart Toqaevtyń shtaby jaqsy jumys júrgizip jatqany baıqalady.
«Osyǵan baılanysty Matrıtsa.kz saıtynda jaqsy bir taldaý materıaly jazylypty. Ondaǵy málimetke súıensek, áleýmettik jelidegi búkil aýqymdaǵy jazbalardyń 74 paıyzy Qasym-Jomart Toqaevqa tıesili eken. Ekinshi orynda Ámirjan Qosanov tur. Sebebi, Ámirjan Qosanovtyń ózi de, onyń qoldaýshylary da áleýmettik jelide belsendi jumys júrgizip jatyr. Áleýmettik jelidegi eń belsendiler - osy eki top desek, qalǵan kandıdattardyń úlesi shynyn aıtý kerek, 2-3 paıyzdan aspaı jatyr. Dese de, olardyń áleýmettik jelini paıdalanyp qalý múmkindigi bar sııaqty», - deıdi ol.
Aıdos Sarym óz sózinde «feısbýkstan» úrdisinde de úlken kúsh baryn aıtady.
«Bizdiń Qazaqstandaǵy eń saıasılanǵan áleýmettik jeli ol - feısbýk. Biraq, ókinishke qaraı ma, álde baqytqa qaraı ma - ómir feısbýkpen shektelip qalmaıdy. Feısbýkte belsendi degen qalada nemese saıasatqa qatysy bar adamdar otyrady. Olardyń belsendiligi jalpy barsha qazaqstandyqtyń belsendiligin tanytpaıtyny anyq. Sondyqtan, feısbýktiń ishindegi taıtalas aınalyp kelgende saılaýdyń nátıjesi bolady degenge sený qıyn», - deıdi saıasattanýshy.
Aıdos Sarym eń kóp adam otyratyn Instagram jelisinde de negizgi salmaqty kandıdat Qasym-Jomart Toqaev ekenine kózi jetip otyrǵanyn atap ótti.
«Óz basym áleýmettik jeliniń múmkindikterin absolıýttendirýdiń qajeti joq dep oılaımyn. Ol - belgili bir kórinisi, ishinde ne bolyp jatqanyn kórsetetin jaqsy múmkindik. Dese de, Qazaqstannyń qoǵamy men feısbýk teń uǵym emes. Ekeýiniń úlken aıyrmashylyǵy bar. Saılaýǵa kóbine-kóp qarttar men orta býyn barady dep eseptesek, olardyń kóbi ınternette múlde joq. Daýys bergen kezde sol sebepti naqty nátıje múlde ózgerip ketýi múmkin. Máselen, «Breksıt» bolǵan kezde Brıtanııanyń jastary «bizdiń pikirimiz eskerilmedi» dep týlaǵan bolatyn. Biraq, olarǵa tek nege daýys berýge barmadyńdar degen bir ǵana naqty jaýap boldy», - deıdi ol.
Saıasattanýshy óz sózinde saılaýǵa jastar erekshe belsendilik tanytyp jatqanyn baıqaǵanyn aıtady.
«Іri qalalarda, áleýmettik jelilerde jastardyń arasynda úlken belsendilik baıqalady. Saılaý kúni baqylaýshy bolaıyq degen jastardyń sany artyp keledi. Bul meniń oıymsha, jaqsy úrdis. Sebebi, jańa býyn, jańa tolqyn saılaýshylardyń legi kele jatyr. Olarǵa jaqsy múmkindik berilýi kerek. Saılaýǵa baqylaýshy bolý - olardyń azamattyǵyn, memleket ómirine atsalysý úrdisine yqpal etý kerek dep esepteımin», - dep túıdi sózin Aıdos Sarym.
Eske sala ketsek, 11 mamyrda Qazaqstanda kezekten tys prezıdent saılaýy aldyndaǵy úgit-nasıhat sharalary bastalǵan bolatyn.
Bıylǵy saılaý osymen altynshy ret ótip otyr. Osy joly QR Ortalyq saılaý komıssııasy jeti kandıdatty tirkedi. Olardyń ishinde «Nur Otan» partııasynan -Qasym-Jomart Toqaev, «Aýyl» halyqtyq-demokratııalyq patrıottyq partııasynan - Tóleýtaı Rahymbekov, Qazaqstannyń kommýnıster partııasynan Jambyl Ahmetbekov, «Ult taǵdyry» ulttyq-patrıottyq qozǵalysynan Ámirjan Qosanov, «Uly dala qyrandary» respýblıkalyq qozǵalysynan Sádi-Bek Túgel, Qazaqstan Respýblıkasynyń kásipodaqtar federatsııasynan Amangeldi Taspıhov jáne «Aq jol» Qazaqstannyń demokratııalyq partııasynan Danııa Espaeva bar.
