Aıdos Sarym: Prezıdent saılaýy – saıası reformalardyń bir kórinisi

NUR-SULTAN. QazAqparat – Respýblıka Prezıdentiniń 7 jyldyń mandaty saıası baǵdarlamany iske asyrýǵa tolyǵymen jetkilikti. Bul pikirdi saıasattanýshy, QR Parlamenti Májilis depýtaty Aıdos Sarym aıtty, dep habarlaıdy QazAqparat tilshisi.

Óz pikirinde sarapshy Prezıdent saılaýyn bıyl ótkizýdiń sebebin túsindirdi.

«Bul suraqqa Prezıdenttiń ózi naqty jaýap bergen sııaqty. Eń basty másele, saıası reformalardy bastaý, referendým kezinde qurylǵan saıası júıeniń naqty kórinisi, kórsetkishi – onyń iske asýy bolmaq. ıAǵnı, bir jaǵynan qoǵamnyń ózi qazir bir jyl, eki jyl kútip otyrǵysy joq. Ekinshi jaǵynan, kóterilgen kóptegen máselelerdi iske asyrý úshin Prezıdenttiń de, Parlamenttiń de saıası mandaty jańarýy kerek. Bul eldegi búkil saıası oıyn erejelerin ózgertip, jańa saıası tulǵalardy, jańa partııalardy alańǵa ákelip, qoǵamdyq-saıası ómirdi belsendi etip, sol arqyly saıası jańarýdy, jańa kózqarastardyń ornyǵýyn, olardyń saıası dástúrge aınalýyn qamtamasyz etý kerek dep aıtty. Sondyqtan bul tosyn saılaý emes, júıeli, osy ózgeristerdi halyqtyń yqylasyn, saıası júıeni iske asyrý baǵytynda jasalyp otyrǵan naqty qadam dep aıtýǵa bolady», - dedi A. Sarym agenttik tilshisine bergen suhbatynda.

Onyń pikirinshe, Prezıdenttikke jeti jyl merzim asa kóp emes, sebebi Prezıdent bir ret qana saılana alady.

«Eń bastysy elimiz qazir sýperprezıdenttik modelden ketip jatyr. Jeti jylda Prezıdenttiń óziniń saıası baǵdarlamasyn iske asyratyn, tolyqqandy jumys isteı alatyn múmkindigi bar. Kem degende eki Parlament saılaýynyń basy-qasynda bolady, saıası kýrsqa, qabyldanatyn saıası zańdardyń, sheshimderdiń barlyǵyna yqpal ete alady. ıAǵnı, bul bolashaqtaǵy saıası ýzýrpatsııany joıatyn, oǵan toqtaý qoıatyn naqty qadam. Mysaly, bılikke kelgen adam «Bir-aq ret Prezıdent bolam, osy 7 jylda búkil oılaǵanymdy, jurtqa bergen ýádemdi oryndap shyǵýym kerek» degen maqsatpen kelýi kerek», - dedi saıasattanýshy.

Sonymen birge A. Sarym elimizde tutas saılaý júıesi ózgeretinin atap ótti. Buryn aýdandyq máslıhat, qalalyq máslıhattar partııalyq tizimmen saılanatyn bolsa, aldaǵy saılaýda olardyń barlyǵy jekelegen azamattardyń saılaýǵa túsýin qamtamasyz etedi.

Eske sala ketsek, Memleket basshysy Qasym-Jomart Toqaev Qazaqstan halqyna Joldaýynda Prezıdent mandaty uzaqtyǵy 7 jyldyq bir merzimmen shekteýdi jáne bıyl kúzde kezekten tys Prezıdent saılaýyn ótkizýdi usyndy.