Aıdos Sarym: Qoǵamdyq damý mınıstrligi azamattyq sektor uıymdaryn ortaq múddege negizdeýi qajet
Saıasattanýshy jalpy Qoǵamdyq damý mınıstrliginiń qurylýyn qoldaıtynyn aıtady.
«Meniń oıymsha, másele mınıstrliktiń ataýynda emes, aınalysatyn sharýasynda. Qazir mınıstrliktiń aty jańadan qoıylyp, jańa departamentter men qurylymdardyń bólimsheleri berilip jatyr. Soǵan qaraǵanda, jańa mıssııasyn, jańa qujattaryn, jańa erejesin jasaqtap shyǵý kerek. Jańa strategııasynda mınıstrlik nemen aınalysady degen suraq týady ǵoı. Jastar saıasaty, Úkimettik emes uıymdar ǵana emes, sonymen qatar saıası partııalardyń jumysyn bir izge túsirý, solardyń jańa alańdaryn jasaqtaýmen birge, tipti Assambleıanyń janynda júrgen ulttyq mádenı ortalyqtarmen jumysty osy jaqqa (jańa mınıstrlikke - avt.) beredi degen áńgime bar. ıAǵnı, jalpy olardy azamattyq sektordaǵy uıymdardy bólip jiktemeı, kerisinshe bir jerge, ortaq múddege, ortaq múmkindikterge negizdese, menińshe, áldeqaıda tıimdi bolar edi», - deıdi saıasattanýshy.
Aıdos Sarym sonymen birge, saıası partııalyq júıe týraly sóz qozǵady.
«Mınıstrlik bir jaǵynan saıası partııalyq júıeniń bir izge kelýine jumys istese... Sebebi, búgingi qoǵamdaǵy saıası partııalardyń eshqandaı bedeli qalmady. Kóbisi dekoratıvti túrde jumys istep jatyr. ıAǵnı, jańa partııalardyń dúnıege kelýine, olardyń jeńil tirkelýine, jalpy oıyn erejesiniń ózgerýine jumylsa, ol da aldaǵy 10-15 jyldyń damýyna qosqan úlken úles bolady dep esepteımin. Sebebi, jańa zamanǵa saı partııasy da bolýy kerek», - deıdi ol.
Saıasattanýshynyń aıtýynsha, osy jyldardyń ishinde azamattyq sektor, azamattyq uıymdarda turalap qalý baıqalǵan.
«Bizdiń Qazaqstandaǵy aımaqtardyń da damýy birkelki emes. Mysaly, Almaty, Astana sııaqty qalalarda azamattyq sektor uıymdarynyń belsendiligi joǵary. Olarda ár sala boıynsha tıisti azamattardyń birlestikteri bar. Al keıbir aımaqtarda qoǵamnyń damýyna qajetti uıymdardyń óziniń sany jetispeı jatady. Ásirese, qazirgi tyń taqyryptarǵa, ekologııa, tsıfrlandyrý deımiz... Dástúrli, adamdar úırenip qalǵan, KVN nemese basqa da emes, shynynda da, qoǵamnyń ishinde talaby, tilegi bar, sońǵy kezde qalyptasqan formalızmnen arylyp, jańa oıyn erejelerin engizip, azamattyq sektordyń shynynda da úlken kúshke aınalýy sekildi jumystardy bir izge salsa bolar edi», - deıdi saıasattanýshy.
Aıdos Sarym sonymen qatar, qoǵamdyq uıymdardyń belsendilerin de Parlamentke qozǵaıtyn jaǵdaı bolsa ıgi bolar edi degen pikir aıtty.
«Júzdegen, myńdaǵan muǵalimderdiń nemese dárigerlerdiń birlestigi sekildi iri qoǵamdyq korporatsııalardyń ókilderin Assambleıanyń kvotasymen nege (Parlamentke) ótkizbeske? ıAǵnı, jańa qoǵamdyq ómir men azamattyq qoǵamǵa qatysty jańa bir tyń kontseptsııalardy engizip, aldaǵy 2-3 jylda ony júzege asyryp, osy saladaǵy oıyn erejelerin zamanǵa saı qylatyn bolsa, ondaı mınıstrliktiń qurylýyn qoldaýǵa da, quptaýǵa da bolatyn sekildi», - dep túıdi Aıdos Sarym.
Aıta ketsek, keshe Qazaqstan Respýblıkasynyń Prezıdenti Nursultan Nazarbaev «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Jarlyqqa qol qoıǵan bolatyn. Jarlyq boıynsha Qazaqstan Respýblıkasynyń Din isteri jáne azamattyq qoǵam mınıstrligi Qazaqstan Respýblıkasynyń Qoǵamdyq damý mınıstrligi bolyp atalatyn boldy.