Aıdos Sarym eń yqpaldy saıası ekspertterdiń reıtinginde kósh bastady
«Búginde elde bolyp jatqan oqıǵalarǵa sarabdal pikirin bildirip otyratyn óz salasyna jetik kásibı sarapshylardyń qoǵamdyq pikir qalyptastyrýdaǵy yqpaly keıbir basylymdardan basym tur», - delingen reıtıng sıpattamasynda.
Arnaıy reıtıngtiń onynshy orny belgili qarjyger Aıdan Káribjanovtyń enshisinde.
Toǵyzynshy oryn jýyrda ǵana «Sakraldy Qazaqstan» ǵylymı-zertteý ortalyǵy basshylyǵyna kelgen belgili saıasattanýshy Berik Ábdiǵalıulyna buıyrdy.
Aqparat quraldary arqyly da, áleýmettik jelidegi paraqshasy arqyly da elimizdiń damý úderisi, qoǵamdyq-saıası júıelerdiń jetilýine qatysty tuşymdy pikirlerin turaqty bildirip turatyn jáne bir salmaqty saıasattanýshymyz Erlan Saıyrov. Tek saraptama-boljam jasap qana qoımaı, qoǵamdyq jumystarǵa uıytqy bolý arqyly da jańa bastamalardyń janynda júretin azamat segizinshi orynǵa turaqtady.
Ulttyq túıtkilder men jahandyq geostrategııalyq máselelerdiń máıegine jetik sarapshy - Rasýl Jumaly. Qoǵamdyq pikir qalyptastyrýda ózindik qoltańbasy bar saıasattanýshy jetinshi orynǵa jaıǵasty.
Otandyq saıasattaný salasyndaǵy salıqaly esimderdiń biri Gúlmıra Ileýovaǵa altynshy oryn tıdi.
Saıası ózgerister men demokratııalyq qundylyqtarǵa qatysty qarymdy pikirlerimen kózge túsip júrgen Marat Shıbutovqa reıtıngten besinshi oryn buıyrdy.
Qazaqstan ekonomıkasynyń áleýeti men damý barysyn jetik biletin jas ta bolsa azýly sarapshy Oljas Qudaıbergenov tórtinshi orynǵa turaqtady.
Sarapshylardyń ishinde eldegi ekonomıkalyq ahýaldyń búge-shúgesin jetik biletin sanaýlylardyń biri - Raqym Oshaqbaev. Salada bolyp jatqan oqıǵalarǵa beıjaı qaraı almaıtyn, turaqty túrde tereń taldaýlarymen tamsandyryp kele jatqan mamanǵa úshinshi oryn buıyrdy.
Al, saıasattaný salasynda bilgirlerdiń biregeıi Dosym Sátbaev bolsa ekinshi oryndy ıelendi.
Belgili saıasattanýshy Aıdos Sarym reıtıngtiń tórine jaıǵasty. Alashshyl azamat ulttyq máseleden bastap, qazaqtyń qamyna qatysty qoǵamdyq dúnıelerdi der kezinde tereń qozǵap, saraptap berip, óz pikirin únemi bildirip otyrady.