Aıdos Sarym: Bankterge nesıe saıasatyn qaıta qaraý kerek
«Bul durys ári zańdy qadam. Byltyrdan beri Úkimet áleýmettik betburystar jasap keledi. Sonyń zańdy jalǵasy dese de bolady. Bul jerde birneshe eleýli dúnıeni eskerý kerek. QR Prezıdenti Qasym-Jomart Toqaev sońǵy eki devalvatsııadan keıin halyqtyń ájeptáýir kedeılengenin aıtqan bolatyn. Bul jaǵdaıda ásirese boryshy barlar bolashaqqa qam jasaý múmkindiginen aıyryldy», - deıdi Aıdos Sarym.
Saıasattanýshynyń aıtýynsha, eldiń azǵantaı tabysy men alatyn áleýmettik kómegi nesıe jabýdan aspaı tur.
«Men Almatydaǵy «Baqytty otbasy» qorynyń basshylarynyń birimin. Shotyna túsken azǵantaı qarajaty bankke ketip jatqanyn aıtatyndar óte kóp. Turaqty tabysy men jumysy barlarǵa qaraǵanda áleýmettik áljýaz toptar úshin nesıe degen qaıtarýy múmkin emes boryshqa aınaldy. Onyń syrtynda túrli paıyzdyq komıssııalary bar. Nesıelerdiń túrli kezeńderde, túrli sebeptermen alynǵany aıtpasa da túsinikti. «Eldikindeı telefonym bolsa» degen tutynýshylyq nıetpen alatyndar da bar. Sol tutynýshylyq nıet keıin aıaqqa oralǵy bolǵan jaıttar da bar», - deıdi ol.
Aıdos Sarym Úkimettiń bul sheshimin halyqpen jasalǵan «áleýmettik kelisimshart» retinde baǵalaıdy.
«Qazir barlyq nesıelerińizdi jaýyp, bolashaqqa qam jasaı alasyzdar. Esesine belgili bir kezeńge deıin tutynýshylyq nesıeden bas tartý qajet. Óıtpegen jaǵdaıda bári burynǵydaı qalmaq. Budan halyq utylmaıdy. Rasymen de bir tynystaıtyn ýaqyt jetti. Ásirese turaqty tabysy men jumysy joq kópbalaly analarǵa bul aıtarlyqtaı demeý. Nemese múgedekterdi alaıyq. Kóbi úıde omalyp otyr. Halyqqa jaqsy múmindik berildi dep oılaımyn. Bir jaǵynan bul nesıeni shekten tys taratqan bankterge de úlken kómek boldy. Osyny eskere kele, bankterge nesıe saıasatyn qaıta qaraý kerek dep sanaımyn. Nesıe bermes buryn onyń qaıtarylý múmkindigi saraptalýy kerek», - deıdi saıasattanýshy.
Aıdos Sarymnyń aıtýynsha, atalmysh bir rettik aktsııanyń birneshe áseri bolmaq. Bir jaǵynan halyqtyń aýyrtpalyǵyn jeńildetse, ekinshi jaǵynan bankterdiń normatıvin jaqsartady.
«Aktsııanyń bir rettik bolǵany jáne dál qazir iske asqany abzal. Az ǵana nesıesin qaıtara almaı júrgen turǵyndar úshin bul úlken kómek. Biraq mundaı qadam alaıaqtyq áreketterge jol ashyp, enjarlyq týǵyzbaýy kerek», - dep túıindedi Aıdos Sarym.
Eske salsaq, QR Prezıdenti Qasym-Jomart Toqaev qazaqstandyqtardyń borysh júktemesin jeńildetý týraly Jarlyqqa qol qoıǵan bolatyn.
