Aıdos Sarym AMANAT partııasynyń maqsatyn atap berdi
«Bizdiń baǵdarlama halyqpen birge jazylǵan. Biz turǵyndardyń naqty máselelerin bilemiz jáne olardy sheshe alamyz. Elde tártip ornatyp, áleýmettik ádilettilikti qamtamasyz etemiz. Elimizden zańsyz shyǵarylǵan kapıtaldy qaıtarýǵa qol jetkizemiz. Sonymen qatar sybaılas jemqorlyq, olıgopolııalarǵa jáne latıfýndısterge qarsy kúresti kúsheıtemiz. Ár otbasy, árbir qazaqstandyqtyń tabysyn arttyratyn bolamyz. Jańa áleýmettik kodeksti qabyldaımyz. Biz aǵa býynnyń zeınetaqysyn jáne bazalyq zeınetaqyny arttyramyz. Zııandy zattarmen jumys isteıtinder úshin merziminen buryn zeınetke shyǵýyna qol jetkizemiz», - dedi Aıdos Sarym KTK telearnasynda ótken pikirsaıys barysynda.
Sondaı-aq, Aıdos Sarym muǵalimder men dárigerlerdiń, áleýmettik qyzmetkerler men áskerı qyzmetshilerdiń jalaqysyn arttyrý máselesin atap ótti.
«2 mıllıonǵa jýyq azamat alatyn áleýmettik kómekti 1,5 esege arttyramyz.1 mıllıonnan astam oqýshy ornyn qamtıtyn mektepter salamyz. 730 myń otbasyna turǵyn úı salamyz. Ekonomıka salasynda jyl saıyn 40 myńnan astam sapaly jumys ornyn ashatyn júzdegen kásiporyn ashamyz. 1,5 mln jas qazaqstandyqty turaqty jumyspen qamtamasyz etemiz. Biregeı jaǵdaı jasaıtyn jańa salyq kodeksin qabyldaımyz. Odan bólek, bıznes úshin 15 myń retteýshi kedergilerdi alyp tastaımyz», - deıdi AMANAT partııasynyń múshesi.
«Aýyldardy jandandyryp, oǵan 1 trln teńge baǵyttaımyz. Agrarlyq sektorda 100 ınvestıtsııalyq jobany iske asyryp, oǵan 1,5 mlrd dollar jumsaımyz. Biz «Jer amanaty» jobasyn jalǵastyryp, memleketke taǵy 5 mln ga jerdi qaıtaramyz. Qurmetti saılaýshylar, biz saılaý aldy ýádelerimizdiń oryndalýyna kepildik beremiz», - dep atap ótti Aıdos Sarym.
Parlament Májilisi saılaýyna qatysatyn 7 saıası partııa ókilderi arasynda pikirsaıys bastaldy. Debat KTK telearnasynyń tikeleı efırinde ótip jatyr.
Pikirsaıysqa «Amanat» partııasynan Aıdos Sarym, «Aýyl» halyqtyq demokratııalyq partııasynan Jıgýlı Daırabaev, «Respublica» partııasynan Dınara Shúkijanova, Qazaqstan halyq partııasynan Ermuhamet Ertisbaev, «Baıtaq» jasyldar partııasynan Aınur Sábıtova, «Aq jol» demokratııalyq partııasynan Dánııa Espaeva, al Jalpyulttyq sotsıal-demokratııalyq partııasynan Ashat Rahymjanov qatysýda.
