Aıdos Sarym tsıfrlyq quqyqtardy Konstıtýtsııada bekitýdiń mánin túsindirdi

ASTANA. KAZINFORM – Qazaqstanda konstıtýtsııalyq reformalar aıasynda azamattardyń tsıfrlyq keńistiktegi quqyqtaryn qorǵaý máselesi qarastyrylyp jatyr. Bul týraly Májilis depýtaty, Konstıtýtsııalyq reformalar jónindegi komıssııa múshesi Aıdos Sarym Jibek Joly telearnasyna bergen suhbatynda aıtty.

Depýtattyń aıtýynsha, qazirgi kezde qylmys sıpaty ózgerip, zańbuzýshylyqtardyń edáýir bóligi ınternet pen tsıfrlyq ortaǵa aýysyp keledi. Bul jaǵdaı jańa quqyqtyq tásilderdi talap etti.

– Qazir qylmystyń basym bóligi tsıfrlyq keńistikke kóship barady. Internette qylmys jasaý úshin kúsh qoldanýdyń qajeti joq, tek tetigin bilseń jetkilikti. Adamnyń tsıfrlyq quqyqtary onyń fızıkalyq quqyqtarymen birdeı qorǵalýy kerek degen ustanym usynyldy, - dedi Aıdos Sarym.

Sonymen qatar ol tsenzýranyń sóz bostandyǵy men baspasóz erkindigin shekteýge baǵyttalmaǵanyn atap ótti. Onyń aıtýynsha, Konstıtýtsııada tsenzýraǵa tyıym salý, oı erkindigi men sóz erkindigi qaǵıdattary ózgerissiz saqtalady.

Odan bólek, depýtat halyqaralyq quqyqta kózdelgen belgili bir shekteýlerge de toqtaldy. Mundaı normalar adamnyń ómirine nemese memlekettiń ulttyq qaýipsizdigine qaýip tóngen jaǵdaıda ǵana qoldanylýy múmkin.

– Bul halyqaralyq standarttarda bar qaǵıdattar. Biz olardy ulttyq zańnamaǵa sáıkestendirý máselesin qarastyryp otyrmyz, - dep túıindedi Aıdos Sarym.

Aıta keteıik, buǵan deıin ol Konstıtýtsııalyq reformalar jónindegi komıssııasynyń 3-otyrysynda Quryltaı depýtattarynyń ókilettikteri artatynyn aıtqan edi.