Aıdos Sarym: Kópbalaly otbasylar iri qalalarǵa kóp bólmeli páterdiń azdyǵynan kele almaı jatyr

ASTANA. KAZINFORM — Májilis depýtaty Aıdos Sarym qurylys naryǵyn retteý saıasaty men demografııalyq saıasatty úılestirip júrgizýdi usyndy.

— Men ádeıilep statıstıkany qaradym. Osydan 15-20 jyl buryn páter salý kezinde 2-3 bólmeli páterlerge basymdyq berilse, qazir qalalarda beriletin páterlerdiń jartysy — 1 jáne 2 bólmeli. Keıingi 10-15 jylda shynymen de 1 bólmeli páterlerdiń úlesi teń jartysyna artqan. Salynatyn páterlerdiń kóbi 1 jáne 2 bólmeli bolsa, kópbalaly otbasylar oǵan kire almaıdy. Osyny boldyrmaý úshin qurylys kompanııalaryna durys sıgnaldar bereıik. Bálkim bir jeńildikter qarastyrý kerek shyǵar. «Qalalarǵa osynsha bólmeli páter kóbirek kerek» degen sıgnal berilý kerek sııaqty. Óıtkeni balasy kóp otbasylardy jer úılerge yǵystyryp jatyrmyz. Olar óńirlerge kóshýge májbúr. Qurylys naryǵyn retteý isinde de demografııalyq saıasat bolý kerek, — dedi depýtat.

Ónerkásip jáne qurylys mınıstri Ersaıyn Naǵaspaev depýtattyń usynysyn qoldaýǵa daıyn ekenin aıtty.

— Onda biz Eńbek jáne halyqty áleýmettik qorǵaý mınıstrligimen birlesip, normatıvtik jolyn pysyqtaıyq, — dedi ol.

Aıta keteıik, dál qazir Májilis qurylys qyzmetin qaǵazbastylyqtan aryltatyn qujatty qarap jatyr.