Aıdos Sarym Konstıtýtsııalyq komıssııa jóninde: kóptegen oı men usynystar júzege asty
ASTANA. KAZINFORM — Myńdaǵan el azamatynyń belsendi qyzmetiniń arqasynda dúnıege jańa Konstıtýtsııa jobasy keldi. Bul týraly Konstıtýtsııalyq reforma jónindegi komıssııanyń HII otyrysy komıssııa múshesi, Májilis depýtaty Aıdos Sarym málim etti.
- Konstıtýtsııalyq komıssııa qurylǵaly beri 12 otyrys ótkizdik. Ol otyrystardyń barlyǵy halyqtyń kóz aldynda, ıaǵnı ashyq ári aıqyn ótti, barsha el aýmaǵynda translıatsııalandy. Onyń syrtynda saǵattap ótken, túnge qalǵan jumys sektsııalary men redaktsııalyq alqanyń, úlkendi-kishili jınalystardyń sany qanshama? Arasynda oı men sóz talastyryp, keshendi máseleler boıynsha talaı pikirtalas ótizdik. Alaıda, halyq aldyndaǵy tarıhı mıssııamyzdy tereń túsinip túısingendikten, Prezıdent quryltaıda aıtqan ıdeıalardy iske asyrý maqsatynda qajetti mámlege kele bildik. Qıynnan qıystyryp, utymdy usynystar jasaı aldyq. Sonymen qatar, osy kúnderi el bolashaǵyna shynaıy alańdaýshylyǵyn tanytyp, elektrondy platformalar arqyly oı bólisken 10 myńnan astam adamǵa, saıası partııalar men qoǵamdyq uıym ókilderine de zor alǵysymdy aıtqym keledi. Kóptegen oı men usynystar júzege asty. Sózbe-sóz bolmasa da, Ata Zańǵa endi, - dedi A.Sarym.
Osy oraıda ol barsha usynys bergen azamattardyń aty atalyp, olarǵa Konstıtýtsııalyq Sot atynan nemese Konstıtýtsııalyq komıssııa atynan resmı túrde alǵys aıtylyp, «alǵys hat» berilse eken degen usynysyn jarııalady.
- Osy ortaq jumys úshin zalda otyrǵan komıssııa múshelerine, kúni-túni bizderge qyzmetin aıamaǵan jáne qajyrly eńbek etken Konstıtýtsııalyq Sot, Májilis pen Senattyń, Prezıdent Ákimshiliginiń, Úkimet apparatynyń, Bas prokýratýranyń, Ádilet mınıstrliginiń, ákimdikter men máslıhattardyń, joǵary oqý oryndarynyń, ǵylymı ınstıtýttardyń jaýapty qyzmetkerlerine rahmet aıtqym keledi. Nátıjesinde, myńdaǵan el azamatynyń belsendi qyzmetiniń arqasynda dúnıege jańa Konstıtýtsııa jobasy keldi, - dedi depýtat.
Buǵan deıin Konstıtýtsııa jobasy boıynsha 10 myńnan astam ótinish túskenin jazǵan edik.
Aıta keteıik, 31 qańtarda Konstıtýtsııalyq reformalar jónindegi komıssııa Qazaqstan Respýblıkasynyń jańa Ata Zańynyń jobasyn jarııalady.