Aıdos Sarym: Qazaqstan jańa konstıtýtsııalyq dáýirge qadam basty
ASTANA. KAZINFORM – 1 qyrkúıekten bastap elimizdiń saıası júıesinde jańa kezeń bastalady. Jańa Quryltaı jumysy bastalyp, saıası ózgerister júzege asady. Sonyń ishinde birqatar memlekettik organdardyń basshylary da saılanatyn bolady. Bul týraly Jibek Joly telearnasynyń JJ Studio baǵdarlamasyna bergen suhbatynda QR Parlamenti májilisiniń depýtaty Aıdos Sarym aıtty.
Depýtattyń aıtýynsha, sońǵy jyldardaǵy eń mańyzdy saıası ózgeris – jańa Konstıtýtsııanyń qabyldanýy.
- Ótken jyldyń kúzinen bastap bul qujatty ázirleý jumystaryna áýeli Parlamenttiń jumys toby, keıin Prezıdent tapsyrmasymen Konstıtýtsııalyq komıssııa músheleri qatysty. Budan soń óńirlerde túsindirý jáne nasıhattaý jumystary júrgizildi. Sanaýly kúnnen keıin jańa Konstıtýtsııa tolyq kúshine enedi. Osylaısha elimizde jańa saıası qatynastar men jańa konstıtýtsııalyq dáýir bastalady, - dedi ol.
Onyń aıtýynsha, taǵy bir ózgeris Úkimet pen depýtattar arasyndaǵy ózara is-qımyl da jańa deńgeıge kóterilgen. Zań jobalaryn birlesip ázirleý tıimdi tájirıbege aınalyp keledi.
- Buryn zań jobalaryn ázirleý men qabyldaý úderisi birneshe jylǵa sozylsa, búginde bul merzim aıtarlyqtaı qysqardy. Sonymen qatar zańnamalyq bastamalardyń basym bóligi depýtattardyń usynysymen kóterilip jatyr. Bul Parlamenttiń róli men yqpalynyń artqanyn kórsetedi. Sonymen qatar qoǵam talaptaryna saı mańyzdy zańdardy ýaqytyly qabyldaý basty mindetterdiń biri bolyp qala beredi, - dedi Aıdos Sarym.
Aıdos Sarym jańa Parlament jasaqtalǵannan keıin depýtattardyń jaýapkershiligi de kúsheıetinin atap ótti.
- Alldaǵy bir-eki jylda Quryltaı jumysynda konstıtýtsııalyq reformalardy tolyq iske asyrýǵa basymdyq beriledi. Bul kezeńde qajetti quqyqtyq aktiler qabyldanyp, memlekettik basqarý tetikteri jetildiriledi. Sondaı-aq qoldanystaǵy zańnama men kodeksterge keshendi taldaý júrgiziledi, - dedi QR Parlamenti májilisiniń depýtaty.
Eske salaıyq, 2022 jylǵy respýblıkalyq referendým nátıjesinde Konstıtýtsııaǵa engizilgen ózgerister kúshine engennen keıin zańnamany jańartý jumystary bastaldy. Aıdos Sarymnyń aıtýynsha, zań shyǵarý qyzmetinde áleýmettik sala men ekologııa máselelerine erekshe nazar aýdarylǵan.
-- Mysaly, Qorǵanys jáne halyqaralyq ister komıtetiniń qaraýymen kóptegen halyqaralyq kelisimder ratıfıkatsııalandy. Buǵan qosa, áskerı salaǵa qatysty buryn-sońdy bolmaǵan birqatar zań qabyldandy. Jalpy, barlyq baǵyt boıynsha jańǵyrtý jumystary jalǵasyp jatyr. Ásirese jańa ekonomıkalyq qatynastardy qalyptastyrý men tsıfrlyq platformalarǵa beıimdelý úderisi qarqyndy júrip jatyr, - dedi ol.
Aıta keteıik, Májilistiń kezekti otyrysynda halyqaralyq qarjy ınstıtýttarymen jasalǵan kelisimderge qatysty eki zań qabyldandy.
