Aıdos Sarym bir palataly Parlament qurýǵa qatysty: Naqty algorıtm bolýy kerek

ASTANA. KAZINFORM — Májilis depýtaty Aıdos Sarym Prezıdenttiń bir palataly Parlament qurý týraly bastamasyna qatysty oıyn ortaǵa saldy.

Halyq qalaýlysyna: «Bir palataly Parlament — parlamenttik respýblıkaǵa alǵashqy qadam deýge bola ma?» - degen saýal qoıyldy.

— Joq. Bizde Prezıdent eshqaıda ketpeıdi ǵoı. Bizde prezıdenttik-parlamenttik respýblıka. Tipti, bir palataly Parlament bolsa da, báribir prezıdenttik-parlamenttik respýblıka bolyp qalady. Qazir ol avtomatty túrde sheshiledi, eger referendým ótse jáne Konstıtýtsııa ózgerse, atalǵan ókilettik, shamasy, Parlamentke ótetin sııaqty. Qazir saılaý, partııalar qyzmeti týraly zańdy qolǵa aldyq. Meniń oıymsha, odan bólek, Prezıdent týraly zańdy da muqııat qaraý kerek. Tártip tolyq ári naqty jazylýy tıis. Mysaly, AQSh-ta mundaı suraqtar týyndamaıdy, óıtkeni 28-shi sheneýnikke deıin bári qarastyrylǵan. Biz bolashaqta qandaı jaǵdaı bolatynyn bilmeımiz, sondyqtan bul tártipti barynsha egjeı-tegjeıli jazý óte mańyzdy, — dedi Aıdos Sarym Prezıdenttiń Qazaqstan halqyna Joldaýynan keıin BAQ ókilderiniń saýalyna jaýap bere turyp.

Halyq qalaýlysynyń aıtýynsha, 30 jyl buryn qabyldanǵan Konstıtýtsııada Qazaqstanda jergilikti ózin-ózi basqarý týraly bólek zań qabyldanatyny jazylǵan. 

— Biz soǵan endi ǵana keldik. Álemde ár qala men aýyl óz máselesin ózi sheshedi. Bizde bılikti berý jaǵdaıy tek Senatqa deıin ǵana jazylǵan. Biraq, jaǵdaı basqasha bolýy múmkin. Mysaly, Polshada bir kúnde búkil el basshylyǵy qaza tapqan jaǵdaı bolǵan. Sol kezde kim kelesi bolýy kerek? Bul - úlken daǵdarysqa sebep. Munyń bárin algorıtmge túsirý qajet, — deıdi ol.

Sondaı-aq depýtat bir palataly Parlament qurý máselesi bir jyl boıy jan-jaqty talqylanatynyn málim etti. 

— Arnaıy organ, ıaǵnı Parlamenttik nemese Konstıtýtsııalyq komıssııa qurylýy múmkin. Sheshim qalaı qabyldanatyny týraly naqty algorıtm bolýy kerek. Referendým ótkizbes buryn zańdar daıyn bolýy tıis. Sáıkesinshe, zańnamaǵa ózgerister engizilip, sodan keıin ǵana tolyqqandy júıe qalyptasady, — degen pikirimen bólisti A. Sarym.

Búgin Qazaqstan halqyna Joldaýynda Prezıdent Qasym-Jomart Toqaev bir palataly Parlament qurý týraly bastama kóterdi. 

Sonymen qatar Memleket basshysy 30 jylda Senat asa mańyzdy tarıhı mıssııasyn abyroımen atqarǵanyn basa aıtty.