Aıdos Sarym: ÁMSQ degen bir maıshelpek

ASTANA. KAZINFORM – Májilis depýtaty Aıdos Sarym Áleýmettik medıtsınalyq saqtandyrý qoryn maıshelpekke teńedi.

«Zeınetaqy qoryndaǵy, qansha túskenin, onyń qalaı azaıyp, kóbeıgenin qazir kompıýterden telefondaǵy qosymshadan kúndelikti kórip otyramyz. ÁMSQ degenimiz bir maıshelpek. Bárimiz aı saıyn aqsha aýdaryp jatyrmyz. 10 jylda bir baratyn shyǵarmyz, bes jylda bir baratyn shyǵarmyz. Osy jaýapkershilik máselesin jetildirip, ár azamattyń qordaǵy izin kórsetý múmkindigi bar», - dep surady ol Májilistiń jalpy otyrysynda.

Premer-mınıstrdiń orynbasary Tamara Dúısenova bul máseleni retteý kelesi jylǵa qaldyrylǵanyn aıtty.

«ÁMSQ-ǵa neshe azamattyń qatysyp jatqany, qansha qarajat tólenip jatqany týraly aqparattyń bári Eńbek mınıstrliginiń júıesinde tolyq kórinip tur. Qordyń ıntegratsııalanǵan júıesi bolmaǵandyqtan azamattar ózderine qansha qarajat túsip jatqanyn kóre almaıdy. Bul jumystardy kelesi jyldyń aıaǵyna deıin bitiremiz. Biryńǵaı jınaqtyq zeınetaqy qory sııaqty ár azamatqa qansha qarajat túsip jatqanyn týraly aqparatty berip otyrady. Bıyl 49 aqparattyq júıeniń 22-sin bıyl ıntegratsııalap bitiremiz. Al qalǵanyn kelesi jylǵa qaldyryp otyrmyz», - dedi vıtse-premer.