Aıdos Sadyqovty atty degen kúdikti Qazaqstan polıtsııasynda jumys istemeıdi — ІІM

ASTANA. KAZINFORM — Ýkraına astanasynda qastandyqqa tap bolǵan qazaqstandyq jýrnalıst Aıdos Sadyqovty óltirýi múmkin kúdiktilerdiń esimi ataldy. Osyǵan oraı Qazaqstannyń Іshki ister mınıstrligi málimdeme jasady. 

Eske sala keteıik, 18 maýsymda Kıevte turatyn jýrnalıst Aıdos Sadyqovty úıiniń janynda kóliktiń ishinde áldebireýler atyp ketken bolatyn.

Ol qazir aýrýhanada jatyr, jaǵdaıy aýyr.

Áıeli Natalıa Sadyqovanyń aıtýynsha, ýkraın polıtsııasy osy qylmysqa qatysy bar adamdardy tapqan. 

Olar — 33 jastaǵy Meıram Qarataev pen 36 jastaǵy Altaı Jaqanbaev. Ekeýi 2 maýsymda Kıevke kelip, páter jaldap turǵan. 

Aıtýynsha, Meıram Qarataev — Qostanaı oblysy polıtsııa departamentiniń qyzmetkeri. 

Degenmen búgin ІІM bul aqparatty joqqa shyǵardy.

— Azamat M.Qarataevqa qatysty onyń 2019 jyldyń qańtar aıynda ishki ister organdarynan bosatylǵanyn jáne qazirgi ýaqytta polıtsııa qyzmetkeri emes ekenin habarlaımyz. Qazir biz Memleket basshysynyń tapsyrmasymen istiń búkil mán-jaıyn anyqtaý úshin tıisti jedel is-sharalar júrgizip jatyrmyz, — deıdi vedomstvodan.

Osy jumystyń nátıjesi boıynsha qosymsha aqparat beriledi. 

Aıta keteıik, buǵan deıin Prezıdent Qasym-Jomart Toqaev Kıevte jasalǵan qastandyq  jaıynda pikir bildirgen edi. 

— Men dıplomatııalyq arnalar men quqyq qorǵaý organdary arqyly osy oqys oqıǵa boıynsha Ýkraına tarapyna resmı suratý jiberý týraly naqty tapsyrma berdim. Sondaı-aq qajet bolǵan jaǵdaıda Qazaqstannyń resmı organdary istiń aqıqatyna jetýge járdem berý úshin tergeý jumysyna qatysýǵa daıyn ekenin aıtqym keledi, — dedi Prezıdent. 

Prezıdent keńesshisi Berik Ýálıdiń aıtýynsha, Qazaqstandy aıyptaý keıbir kúshterge tıimdi.