Aıdos Qadyluly atty qandasymyz Azııa oıyndarynda Qytaı quramasy sapynda kúresedi – sheteldegi qazaq baspasózi

Ózbekstan men Qazaqstan transshekaralyq aýanyń lastanýyna qarsy birlesip kúresedi – ÓzA 

Qazaqstan men Ózbekstan transshekaralyq aýa lastanýyn azaıtý jáne atmosferalyq aýanyń sapasyn jaqsartý baǵytynda birlesken sharalardy júzege asyrady. Bul másele Tashkenttegi Green University – Ortalyq Azııa qorshaǵan orta jáne klımattyń ózgerýin zertteý ýnıversıtetinde ótken kezdesýde talqylandy, dep habarlaıdy «ÓzA» aqparat agenttigi.

Habarlamada aıtylýynsha, jıynǵa eki eldiń ekologııa, gıdrometeorologııa jáne ǵylymı uıymdarynyń ókilderi qatysyp, aýa sapasyn baqylaý, monıtorıng júıelerin jetildirý jáne PM10, PM2.5 usaq bólshekteriniń taralýyn zertteý máseleleri boıynsha tájirıbe almasty. Kezdesý barysynda transshekaralyq lastanýdy azaıtý úshin birlesken jumys tobyn qurý týraly kelisimge qol jetkizildi.

Qazaqstan delegatsııasy Ózbekstannyń «Taza aýa» jobasy aıasyndaǵy bastamalarymen tanysty. Taraptar ekologııalyq aqparat almasýdy kúsheıtip, ǵylymı zertteýlerdi úılestirý arqyly Ortalyq Azııadaǵy ekologııalyq qaýipsizdikti qamtamasyz etýge baǵyttalǵan yntymaqtastyqty jalǵastyrýǵa kelisti.

Almaty Ortalyq Azııanyń iskerlik jáne týrıstik jetekshi ortalyǵyna aınalady – Eurasia Today

Almaty Ortalyq Azııadaǵy jetekshi iskerlik jáne týrıstik ortalyq retindegi ornyn nyǵaıtýdy kózdep otyr. Qalada týrızm ınfraqurylymyn damytý, halyqaralyq is-sharalar ótkizý múmkindigin keńeıtý jáne zamanaýı týrıstik ekojúıe qalyptastyrý baǵytynda birqatar joba júzege asyrylý ústinde.

Bul týraly Bishkekte shyǵatyn «Eurasia Today» aqparat agenttgi Almaty qalasy ákimdiginiń resmı saıtyna silteme jasap habarlady. 

Keltirilgen derekterge súıensek, Almaty qalasy Týrızm basqarmasynyń basshysy Ǵalııa Toqseıitovanyń aıtýynsha, qalada MICE-týrızmdi damytýǵa erekshe kóńil bólinip otyr. Osy maqsatta halyqaralyq deńgeıdegi jańa kórme keshenin salý josparlanyp otyr. Boljam boıynsha, nysan alǵashqy jyly 50 myń týrıst tartsa, bes jyldan keıin bul kórsetkish jylyna 200 myń adamǵa jetýi múmkin.

Sondaı-aq, joba ekonomıkalyq turǵydan tıimdi baǵyttardyń biri retinde baǵalanyp, onyń áseri 75 mıllıon AQSh dollarynan asýy múmkin. Sonymen qatar qala ınfraqurylymyn jańǵyrtý, áýejaıdy damytý jáne týrıstik nysandar sanyn arttyrý Almatynyń halyqaralyq tartymdylyǵyn kúsheıtip, iskerlik saparlar men ınvestıtsııa kólemin arttyrýǵa yqpal etedi.

Qazaqstannyń etnografııalyq mádenı kórmesi Shanhaıda ashyldy – Halyq gazeti

Qytaıdyń Shanhaı qalasynda Qazaqstannyń etnografııalyq mádenı kórmesi ashyldy. Sharany Shanhaı qalalyq tarıh mýzeıi men Qazaqstannyń Almaty mýzeıler qaýymdastyǵy birlesip uıymdastyrdy.

Bul týraly osy aptada Qytaıdyń Halyq gazeti basylymy habarlady.

Atalǵan BAQ-tyń dereginshe, álemdegi eń iri qurlyq memleketi retinde Qazaqstan - ejelgi Jibek jolyndaǵy mańyzdy torap. Kórmede Qazaqstannyń ejelgi tarıhy men etnografııasyn tanystyratyn 100-den astam eksponat qoıylǵan. Ekspozıtsııa qola dáýirinen búginge deıingi mádenı damýdy qamtyp, kóshpeli órkenıettiń turmys-tirshiligi, qolóneri men rýhanı murasyn tanystyrady. Kórme 30 tamyzǵa deıin jalǵasady.

Aıta keteıik, Shanhaı men Almaty 2025 jyly baýyrlas qalalar mártebesin alǵan. Kórme eki qala arasyndaǵy mádenı baılanysty nyǵaıtýǵa baǵyttalǵan.

Sondaı-aq osy aptada Halyq gazetinde «Astanada «Sálem, Qytaı!» týrızmdi nasıhattaý is-sharasy ótti» degen taqyryptaǵy aqparat jarııalandy. 

Qytaılyq BAQ-tyń málimetinshe, Astanada «Sálem, Qytaı!» týrızmdi nasıhattaý is-sharasy ótti. Jıynǵa Qazaqstandaǵy Qytaı elshiliginiń Keńesshi-mınıstri Chen Kefan, «Atameken» Ulttyq kásipkerler palatasy Týrızm departamentiniń dırektory Dámılıa Qunanova, sondaı-aq eki eldiń týrıstik kompanııalary, áýe tasymaldaýshylary men BAQ ókilderin qosa alǵanda 70-ke jýyq adam qatysty.

Іs-shara barysynda Qytaıdyń týrıstik baǵyttary men ishki týrızm ónimderi tanystyrylyp, áýe kompanııalary ushý baǵyttary men týrıstik marshrýttaryn usyndy. Sonymen qatar týrızm salasyndaǵy kásipkerler arasynda B2B kezdesýler uıymdastyryldy.

Jıyn aıasynda Gansý ólkesiniń Tszıaıýgýan qalasynyń týrızm qaýymdastyǵy men Qazaqstannyń Eýrazııalyq týrızm qaýymdastyǵy yntymaqtastyq týraly kelisimge qol qoıdy. Sondaı-aq «Ádemi Qytaı» atty týrıstik fotokórme uıymdastyryldy.

«Muhammed» Anglııa men Ýelste úshinshi jyl qatarynan eń tanymal ul esimi boldy – ParsToday

Ulybrıtanııanyń Ulttyq statıstıka basqarmasy (ONS) jarııalaǵan 2025 jylǵy málimetke sáıkes, «Muhammed» Anglııa men Ýelste jańa týǵan ul balalarǵa qoıylǵan eń tanymal esim atandy. Osylaısha bul esim úshinshi jyl qatarynan kósh bastap otyr, dep jazdy ParsToday aqparat agenttigi. 

Resmı statıstıkaǵa sáıkes, 2025 jyly Anglııa men Ýelste dúnıege kelgen 5 957 ul balaǵa Muhammed esimi berilgen. Bul kórsetkish boıynsha Noah (Nuh) esimi ekinshi, Leo úshinshi orynǵa turaqtady. Qyz balalar arasynda Olivia onynshy jyl qatarynan eń tanymal esim atansa, Lily ekinshi, Amelia úshinshi orynǵa jaıǵasty.

Parstoday aqparat agenttiginiń keltirgen derekterine súıensek, sarapshylardyń pikirinshe, keń taralǵan esimder reıtınginde ózgerister birden bolmaıdy jáne belgili bir esim tanymaldyqqa ıe bolǵan soń, uzaq ýaqyt boıy kóshbasshylyq ornyn saqtap qalýǵa beıim.

Túrkııa halqynyń sany boıynsha álemde 18-shi el boldy – TRT

Túrkııa halqynyń sany boıynsha álemde 18-orynǵa turaqtady. Túrkııa Statıstıka basqarmasynyń «Dúnıejúzilik halyq kúni – 2026» bıýlletenine sáıkes, el halqy 86 mıllıon 92 myń 168 adamdy qurap, álem halqynyń shamamen 1 paıyzyn quraıdy.

Bul týraly osy aptada Túrkııa Radıo Televızııa portaly habarlady.

«TRT»-nyń dereginshe, BUU-nyń boljamyna sáıkes, 2025 jyldyń ortasynda álem halqynyń sany 8,23 mıllıard adamǵa jetken. Halqy eń kóp elder qatarynda Úndistan, Qytaı jáne AQSh kósh bastap tur. Bul úsh memleket álem halqynyń 39,2 paıyzyn quraıdy.

2025 jylǵy derek boıynsha, álemde balalardyń úlesi 29,3 paıyz bolsa, Túrkııada bul kórsetkish 24,8 paıyzdy qurady. Al 15–24 jas aralyǵyndaǵy jastardyń úlesi álemde 15,6 paıyz, Túrkııada 14,8 paıyz bolyp tirkeldi. Eki kórsetkish te álemdik ortasha deńgeıden tómen bolǵanymen, Eýropalyq Odaq elderiniń barlyǵynan joǵary.

Álemde 65 jastan asqan turǵyndardyń úlesi orta eseppen 10,4 paıyzdy qurasa, Túrkııada bul kórsetkish 11,1 paıyzǵa jetti. Osylaısha, Túrkııadaǵy qarttar úlesi álemdik ortasha deńgeıden joǵary bolǵanymen, Eýropalyq Odaq elderine qaraǵanda tómen deńgeıde qalyp otyr.

Sondaı-aq osy aptada «Túrkııada jazǵy demalysqa arnalǵan bes tamasha meken» degen taqyryptaǵy aqparat jaryq kórdi.

Atalǵan BAQ-tyń keltirgen málimetterine súıensek, Eýropada rekordtyq aptap ystyq saqtalyp jatqan tusta Túrkııa saıahatshylarǵa jazǵy demalysty salqyn klımatta ótkizýge bolatyn birneshe baǵytty usynady. Eldiń taýly óńirleri, orman alqaptary men Qarateńiz jaǵalaýy ońtústiktegi tanymal kýrorttarǵa balama retinde usynylǵan.

Tizimge Artvındegi Shavshat, Chanakkaledegi Bozdjaada araly jáne Bartyndaǵy Amasra qalasy endi. Bul baǵyttar tabıǵı kórinisterimen, tarıhı-mádenı murasymen, jaǵajaılarymen jáne qońyrjaı klımatymen erekshelenedi. Týrıster munda ulttyq saıabaqtardy aralap, jaıaý serýendeýge, jaǵajaıda demalýǵa jáne tarıhı oryndardy tamashalaýǵa múmkindik alady.

Sondaı-aq Rızedegi Chamlyhemshın men Bolýdaǵy Abant kóli tabıǵı saıabaǵy da jazǵy demalysqa qolaıly oryndar qatarynda ataldy. Bul óńirler taýly tabıǵatymen, qalyń ormandarymen jáne ashyq aspan astyndaǵy belsendi demalys túrlerimen tanymal.

Shyńjańdyq Aıdos Qadyluly Azııa oıyndarynda Qytaı quramasy sapynda kúresedi - CNR

2026 jylǵy Azııa oıyndaryna qatysatyn Qytaı quramasynyń kúres túrleri boıynsha sportshylar tizimi jarııalandy. Tizimge sáıkes, Shyńjańnan shyqqan 24 jastaǵy Aıdos Qadyluly erkin kúresten 86 keli salmaq dárejesinde el namysyn qorǵaıdy, dep habarlaıdy Ortalyq halyq radıosy aqparattyq portaly.

Atalǵan basylymnyń kelitirgen derekterine súıensek, buǵan deıin Shyńjańdyq taekvondoshy Ma Jıńıýe de 2026 jylǵy Azııa oıyndaryna qatysý quqyǵyna ıe bolǵan bolatyn. Ol Qytaı quramasy sapynda jarysqa qatysady.

Osylaısha, Shyńjańnan shyqqan eki sportshynyń biri – Aıdos Qadyluly atty qandasymyz 2026 jylǵy Azııa oıyndarynda Qytaı quramasy atynan synǵa túsedi.