Aıdyń sońǵy kúnderi kún raıy qandaı bolady

ASTANA. KAZINFORM — Aıdyń sońǵy kúnderinde el aýmaǵyndaǵy aýa raıy jaǵdaıyna keń aýqymdy tsıklon jáne onymen baılanysty atmosferalyq fronttar áser etedi. 

Aýa raıy turaqsyz bolady. Jańbyr jaýady, keı jerlerde naızaǵaı men burshaq kútiledi. Soltústik, soltústik-batys jáne ortalyq óńirlerde, sondaı-aq ońtústik-shyǵystyń taýly aýdandarynda qatty jańbyr men ekpindi jel boljanady.

Respýblıka boıynsha jeldiń kúsheıýi kútiledi, al ońtústik oblystarda shańdy daýyl turady. 

Soltústik óńirlerde aýa temperatýrasy +18…+23 °C deıin tómendeıdi. Qalǵan aýmaqta aýa temperatýrasy aıtarlyqtaı ózgermeıdi dep boljanady.

Aıta ketelik búgin Qazaqstannyń birqatar aımaǵynda naızaǵaı oınaıdy, órt qaýpi joǵary bolady.