Aıdyn Qulseıitov Medıtsınalyq saqtandyrý qorynyń basshysy bolyp taǵaıyndaldy

ASTANA. KAZINFORM - Densaýlyq saqtaý mınıstri Aqmaral Álnazarova búgin áleýmettik medıtsınalyq saqtandyrý qorynyń ujymyna jańa basshyny tanystyrdy.

Densaýlyq saqtaý mınıstriniń buıryǵymen Premer-Mınıstrmen kelisim boıynsha «Áleýmettik medıtsınalyq saqtandyrý qory» KeAQ Basqarma tóraǵasy laýazymyna Aıdyn Qulseıitov taǵaıyndaldy.

Mınıstrliktiń málimetinshe, Aıdyn Qulseıitov Óskemende dúnıege kelgen.

Shyǵys Qazaqstan memlekettik tehnıkalyq ýnıversıtetin «Injener-ekonomıst» mamandyǵy boıynsha jáne QR Prezıdenti janyndaǵy Memlekettik qyzmet akademııasyn «Memlekettik qyzmet menedjeri» mamandyǵy boıynsha bitirgen.

Eńbek jolyn basqarýshy laýazymdarǵa deıin jeke salada bastaǵan. Sodan keıin Memlekettik qyzmetke aýysty.

Indýstrııa jáne saýda mınıstrliginde, energetıka jáne mıneraldyq resýrstar mınıstrliginde jumys istedi, «Tehnologııalyq damý jónindegi ulttyq agenttik» AQ, «Qazaqstandyq ındýstrııany damytý ınstıtýty» AQ Basqarma tóraǵasy boldy.

2017 jyldan bastap QR Prezıdentiniń Ákimshiliginde birqatar basshylyq qyzmet atqardy.

Eki jyl boıy QR Prezıdenti Ákimshiliginiń Strategııalyq ázirlemeler jáne taldaý ortalyǵyn basqardy. Sodan keıin Qazaqstan Respýblıkasynyń Prezıdenti Ákimshiliginiń Strategııalyq josparlaý bóliminiń meńgerýshisi bolyp taǵaıyndaldy.

Sońǵy eki jylda QR Prezıdenti Ákimshiliginiń Áleýmettik-ekonomıkalyq monıtorıng bóliminiń basshysy bolyp jumys istedi.

Osy ýaqytqa deıin Qazaqstan Prezıdenti Ákimshiliginiń Áleýmettik-ekonomıkalyq saıasat bóliminiń meńgerýshisi laýazymynda qyzmet atqardy.

Erbol Sadyr Abaı oblysy ákiminiń birinshi orynbasary bolyp taǵaıyndalǵanyn jazǵan bolatynbyz.