Aıdaı Isaeva «Álem arýy - 2014» jartylaı fınalynda óner kórsetti (FOTO)
ASTANA. QazAqparat - Qazaqstandyq Aıdaı Isaeva «Álem arýy-2014» konkýrsynyń jartylaı fınalynda ulttyq kıimmen óner kórsetti. Bul týraly konkýrstyń resmı saıty habarlady.
Álemdik arýlar baıqaýynyń jartylaı fınaly kezeńi televıdenıeden kórsetilgen joq, biraq ta qazylar alqasy fınalǵa 16 qyzdy iriktep aldy, ol 25 qańtarda Maıamıde (AQSh) ótedi. «Álem arýy» ataǵy úshin synǵa túsetin on alty qatysýshynyń esimderi konkýrstyń tikeleı efırde kórsetiletin fınalynda jarııalanady.
Jartylaı fınalda álemniń túpkir-túpkirinen baq synaǵan 88 arý sahnada óz ónerlerin pash etti.
Bizdiń otandasymyz sahnada ózin senimdi ustap, fınalǵa ótýge úmittenýde.
Eske sala keteıik, 25 jastaǵy Aıdaı buǵan deıin «Shymkent arýy-2008», «Almaty vıtse-arýy-2013», «Qazaqstan arýy-2013» ataqtaryn jeńip alǵan bolatyn.
