Aıdarbek Saparov jambyldyq fermerlerdiń narazylyq aktsııasyna pikir bildirdi

Aýyl sharýashylyǵy mınıstri Aıdarbek Saparov Jambyl oblysy fermerleriniń narazylyq aktsııasyna qatysty pikir bildirdi, dep habarlaıdy Kazinform. 

«Úkimet rezervinen 392 sharýashylyqtyń shyǵynyn óteý úshin 3,7 mlrd teńge bólindi. Búgingi tańda onyń 1,7 mlrd teńgesi ıgerilip, 246 sharýashylyq qarajattaryn aldy. Narazylyqqa shyqqandarǵa qatysty aıtar bolsaq, olardyń qujattarynda qatelikter bar. Sondyqtan da olar qazirgi ýaqytta qarajattaryn ala almaı otyr. Eger olar barlyq qatelikterin joıatyn bolsa, onda esh kedergisiz alady. Tizimde 392 sharýashylyq bar. Áli de 2 mlrd teńgeni ıgerý qajet. Tipti osy qarajatty ıgere alamyz ba, joq pa dep alańdap otyrmyz», - dedi Aýyl sharýashylyǵy mınıstri Úkimet otyrysynan keıingi baspasóz máslıhatynda.

Aıdarbek Saparovtyń naqtylaı túsýinshe, óńirdiń birqatar fermeri ótemaqy alýǵa usynǵan qujattaryndaǵy derekter sáıkes kelmeıdi. Sonymen qatar qate toltyrylǵan qujattar da bar.

Buǵan deıin aqparat quraldary bıyl Jambyl oblysynyń 6 aýdany qurǵaqshylyqtan zardap shekkenin, óńirde tótenshe jaǵdaı jarııalanǵanyn jazǵan edik. Osydan keıin fermerlerdiń shyǵynyn óteý úshin ótemaqy tólenýi tıis bolatyn. Alaıda taıaýda óńir fermerleri narazylyq tanytyp, qarajattaryn áli almaǵanyn aıtyp dabyl qaqqan-dy.