Aıdarbek Saparov qazaqstandyqtarǵa: Teri men júndi dalaǵa tastamańyzdar
ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynan keıin ótken baspasóz máslıhatynda mal ustap otyrǵan qazaqstandyqtarǵa úndeý tastady.
— Jún qabyldaýmen biz ataǵan 15 kásiporynnan basqa kompanııalar da aınalysýǵa nıet tanytyp otyr. Jún men teri óńdeıtin jańa kásiporyndar ashylǵansha eksportqa ruqsat berip otyrmyz. Onyń ústine halyqtan teri jınaıtyn kásiporyndarǵa sýbsıdııa beremiz. Sondyqtan halyqqa aıtatynymyz, terini de, júndi de dalaǵa tastaýǵa bolmaıdy. Ár oblystyń ákimdikterine tapsyrma berilgen bolatyn. Ár aýdanda servıstik daıyndaý ortalyǵyn ashyp, teri men júndi halyqtan jınap, óńirlik áleýmettik kásipkerlik korporatsııa arqyly óńdeýshi zaýyttarǵa ótkizýge bolady. Terini zaýytqa ótkizgen adamnyń sharýa qojalyǵy nemese fermerlik qojalyǵy bolsa, sol rekvızıtteri arqyly sýbsıdııa tólenedi, — dedi mınıstr.
Sondaı-aq, ol Aqtóbede ashylatyn jún óńdeıtin zaýyt ámbebap kásiporyn bolatynyn aıtty.
— Teri men jún máselesinde qıyn jaǵdaı boldy ǵoı. Ózderińiz bilesizder, kedendik baj kirgizgenniń saldarynan kóptegen eksporttaýshy kompanııanyń jumysy toqtap qalǵan. Paıda bolmaǵandyqtan solaı boldy. Al ózimizdegi teri men jún óńdeıtin kompanııalar baj tetigin paıdalanyp, jumysyn jandandyra almady. Óıtkeni ondaı murshalary da joq. Óńdeý salasynda jańa kásiporyndar salýǵa tyrysyp jatqanymyzdy baıandamamda aıttym. Tamyz aıynda Aqtóbe oblysynda jún óńdeıtin kásiporyn ashylady. Ol júnniń qarasy bolsyn, aǵy bolsyn, sarysy bolsyn, óńdep materıal shyǵara alady, — dedi Aıdarbek Saparov.
Buǵan deıin Qazaqstanda aýyl sharýashylyǵyn tsıfrlandyrý qalaı júrip jatqanyna sholý jasaǵan edik.