Aıdarbek Saparov: Dándi daqyldar óndirisiniń kólemi ishki qajettilikten 6 ese joǵary

ASTANA. KAZINFORM – Іshki naryq negizgi azyq-túlik taýarlarymen tolyq qamtamasyz etiledi. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

- Negizgi azyq-túlik taýarlarymen tolyqtaı qamtyp otyrmyz. Osy jyldyń 8 aıynda tamaq ónimderin óndirý 10,1 paıyzǵa artyp, 2,5 trln teńgeni qurady. Bıdaı egistigi ónimdiliktiń artýy esebinen jalpy ónim byltyrǵy deńgeıde kútilýde. Kúrishtiń jalpy ónimi ótken jyldyń deńgeıinde nemese 500 myń tonnadan aspaq. Bul ishki suranysty tolyq jabýǵa jáne eksportty saqtaýǵa múmkindik beredi. Qaraqumyq óndirisi shamamen 90 myń tonnany quraıdy. Bul ónimdiliktiń artýy esebinen halyq qajettiliginen asyp túsedi, - dedi ol.

Mınıstrdiń atap ótýinshe, dándi daqyldar óndirisiniń kólemi ishki qajettilikten 6 ese joǵary. Bul naryqty qaıta óńdelgen ónimderimen tolyq qamtamasyz etýge kepildik beredi. Sondaı-aq, maıly daqyldar 4 mln tonna, onyń ishinde kúnbaǵystyń shamamen 2 mln tonna ónimi kútiledi. Bul naryqty maı-tońmaı ónimderimen tolyq qamtýǵa jetkilikti.

- Kartopqa keletin bolsaq, 2,7 mln tonna kóleminde jınaý boljanýda. Onyń 1,8 mln tonnasynan astamy jınaldy. Fermerlerde quny kelisine 90-120 teńgeni quraıdy. Sondaı-aq, 700 myń tonnadan astam pııaz jınaldy. Kelisi 50-60 teńgeden satylady. Fermerlerde 300 myń tonna kóleminde qor qalyptastyryldy. 300 myń tonna sábiz jınaldy. Fermerlerde birkelisi 85-95 teńgeden bolatyn shamamen 100 myń tonna sábiz bar, - dedi Aıdarbek Saparov.

Aıta keteıik, bıyl boljam boıynsha 24 mln tonna astyq bastyrylady.