Aıdarbek Saparov aýyl sharýashylyǵy tehnıkasynyń qymbattaý sebebin aıtty

NUR-SULTAN. QazAqparat – Aýyl sharýashylyǵy birinshi vıtse-mınıstri Aıdarbek Saparov agrarlyq tehnıka qunynyń ósýine qatysty pikir bildirdi, dep habarlaıdy QazAqparat tilshisi.

«Agrarshylar tarypynan otandyq óndiristegi aýyl sharýashylyǵy tehnıkasyna baǵanyń kúrt óskeni týraly shaǵymdar túsip jatyr. Qazirgi kezde osy tehınkanyń eleýli túrde qymbattaýy bolyp jatyr, onyń ishinde otandyq kásiporyndardyń ónimine de qatysty. 2022 jyldyń basynda otandyq zaýyttardan shyǵarylǵan aýyl sharýashylyǵy tehnıkasynyń quny traktor men kombaındar boıynsha 2021 jylmen jylmen salystyrǵanda 13-ten 24 paıyzǵa deıin ósti», - dedi A. Saparov Senattaǵy dóńgelek ústel otyrysynda.

Osy oraıda ol qazirgi ýaqytta tehnıkany jetkizýshiler men óndirýshiler baǵany áli de ósirýi múmkin ekenin aıtty.

«Aýyl sharýashylyǵy tehnıkasynyń qymbattaýyna álemdegi ekonomıkalyq ahýal áser etip otyrǵany túsinikti. Bul rette saýda jelesi tizbeginiń buzylýy, valıýtanyń qubylmalyǵy, jabdyqtar men bólshekterdiń qymbattaýy, sondaı-aq kólik qyzmeti qunynyń ósýi yqpal etýde. Degenmen, otandyq óndiris tehnıkasyna baǵanyń qadaǵalaýsyz ósýine jol berilmeýi tıis. Sonymen qatar, álemdegi sońǵy saıası oqıǵalarǵa baılanysty Reseı men Belarýstiń aldyńǵy qatarly óndirýshilerinen Qazaqstanǵa bólshekterdiń jetkizilýi tejelip tur. Sonymen qatar Reseı men Belarýstiń aýmaǵy arqyly basqa elderden tranzıtpen keletin tehnıka men bólshekterdiń jetkizilýi qıyndady», - dedi vıtse-mınıstr.