Aıdarbek Saparov aýyl sharýashylyǵy salasynda iske qosylatyn iri jobalardy atady
ASTANA. KAZINFORM –Búgin Úkimet otyrysynda Aýyl sharýashylyǵy mınıstri Aıdarbek Saparov aldaǵy jyldary aýyl sharýashylyǵy salasynda iske qosylatyn iri jobalardy atady.
— 2026 jyly jalpy somasy 394 mlrd teńge bolatyn 50 jobany iske asyrý jáne 2,5 myń jańa jumys ornyn ashý josparlanyp otyr. Sonyń ishinde 6 iri jobaǵa toqtalǵym keledi. Jambyl oblysynda «Fýfeng Grýp» jobasynyń birinshi kezeńinde 300 myń tonna júgerini tereń óńdeý kózdelgen. Almaty oblysynda «Fruit Art» kompanııasy 25 myń tonna jemis-jıdekterdi óńdeý boıynsha úshinshi kezeńin iske asyrady. «Shın-Laın» balmuzdaq óndirisin 35 myń tonnaǵa deıin ulǵaıtady jáne «Qapshaǵaı Bıdaı Ónimderi» jobasy 250 myń tonna shamasynda astyq jáne maıly daqyldardy óńdeıdi, — dedi ol.
Mınıstrdiń dereginshe, Qostanaı oblysynda «Baıan Sulý» kondıterlik ónimder óndirisin 13 myń tonnaǵa arttyrady. Abaı oblysynda «Evrazııa Agro Semeı» 7,2 myń tonna shujyq ónimderiniń óndirisin iske qosady.
— 2027 jyly jalpy somasy 874,3 mlrd teńge bolatyn 26 jobany iske asyrý jáne 3,5 myńnan astam jumys ornyn qurý kózdelip otyr. Onyń ishinde Astana qalasynda 250 myń tonna bıdaı jáne 80 myń tonna burshaq óńdeıtin «Tiryaki Holding» jobasy, Aqmola oblysynda jylyna 1,0 mln tonna bıdaı óńdeıtin «Dalian Hesheng Holding Group» jobasy jáne 1,0 mln dana jumyrtqany tereń óńdeý boıynsha «KazEggs» kompanııasy, Almaty oblysynda 210 myń tonna kartop óńdeıtin «PepsiCo» jobasy jáne 150 myń tonna mal men ósimdik ónimderin óńdeý boıynsha «Mars» jobasy bar, — dedi Aıdarbek Saparov.
Sonymen qatar ol «UBM grýpp» kompanııasynyń Qostanaı oblysynda 100 myń tonna qurama jem óndirisi jáne Almaty oblysynda 48 myń tonna qospa óndirisi iske asyrylyp jatqanyn atap ótti.
— 2027 jylǵy iri jobalardy iske asyrý — qosylǵan quny joǵary ónimder óndirisin edáýir arttyrýǵa múmkindik beredi, — dedi mınıstr.
Aıta ketelik bıyl 9 aıda 2,5 mlrd dollardyń aýyl sharýashylyǵy ónimderi eksportqa shyǵaryldy.