Aıdarbek Qojanazarov jańa Konstıtýtsııada teńgeni ulttyq valıýta dep bekitýdi usyndy
ASTANA. KAZINFORM — Májilis depýtaty Aıdarbek Qojanazarov Konstıtýtsııada «Qazaqstannyń ulttyq valıýtasy — teńge» dep naqty bekitý bastamasyn kóterdi.
Depýtattyń aıtýynsha, ulttyq valıýta — memlekettiń ekonomıkalyq táýelsizdigi men egemendigin aıqyndaıtyn negizgi kórsetkishtiń biri. Tól valıýta derbes aqsha-nesıe saıasatyn júrgizýge múmkindik beredi. Qarjy júıesiniń turaqtylyǵyn qamtamasyz etedi. Іshki naryqty qorǵaıdy. Álemdik daǵdarystarǵa der kezinde jaýap berýge jol ashady.
— Teńge el azamattarynyń kúndelikti ómirimen tyǵyz baılanysty. Ol eńbekaqy tóleýde, saýda-sattyqta, qyzmet kórsetý salasynda, jalpy ekonomıkalyq qatynastardyń barlyǵynda qoldanylady. Demek, teńge el ekonomıkasynyń jumys isteý tetigin ǵana emes, qoǵamnyń áleýmettik ahýalyn da aıqyndaıdy. Ulttyq valıýta memlekettiń tarıhı jolyn, táýelsizdik kezeńindegi qalyptasý tájirıbesin de beıneleıdi. Teńge — Qazaqstannyń óz damý baǵytyn tańdaǵanyn, qarjylyq jáne ınstıtýtsıonaldyq turǵydan derbes memleket retinde ornyqqanyn kórsetedi, — dedi A. Qojanazarov Konstıtýtsııalyq komıssııanyń 8-shi otyrysynda.
Teńgeniń mártebesin Konstıtýtsııa deńgeıinde bekitý Qazaqstannyń ekonomıkalyq derbestik qaǵıdatyn aıqyndaýǵa múmkindik beredi. Bul teńgeniń ınstıtýtsıonaldyq mańyzyn Ata zań deńgeıinde naqtylap, qarjy-valıýta aınalymy salasyndaǵy memlekettik saıasattyń sabaqtastyǵyn qamtamasyz etedi. Uzaq merzimdi perspektıvada qarjylyq jáne makroekonomıkalyq turaqtylyqtyń quqyqtyq negizderin nyǵaıtady.
— Osy máseleni Ata zańda bekitý arqyly ony túbegeıli sheship, bolashaqta ártúrli alyp qashpa pikirler men alypsatarlyq áńgimelerdiń aldyn alar edik. Alaıda álemdik qarjylyq arhıtektýranyń ózgerý jaǵdaıynda ulttyq valıýta máselesin naqty ári aıqyn retteýdiń mańyzy arta túsýde. Mundaı kezeńde memlekettiń óz valıýtasyna qatysty ustanymyn eń joǵary quqyqtyq deńgeıde bekitý erekshe ózektilikke ıe, — deıdi Respublica partııasynyń jetekshisi.
Onyń aıtýynsha, Ulttyq valıýtanyń mártebesin Konstıtýtsııada bekitý ekonomıkalyq derbestikti naqtylaıdy, teńgeniń ınstıtýtsıonaldyq mańyzyn kúsheıtedi, qarjy saıasatynyń sabaqtastyǵyn qamtamasyz etedi.
— Qazir teńge mártebesi zańmen rettelgen. QR Ulttyq Banki týraly zańǵa sáıkes, ulttyq valıýtamyz — teńge. Alaıda álemdik qarjy júıesi ózgerip jatqan jaǵdaıda bul máseleni konstıtýtsııa deńgeıinde naqtylaý asa mańyzdy dep oılaımyn. Ulttyq valıýtany Konstıtýtsııa deńgeıinde kórsetý halyqaralyq tájirıbede keń taralǵan. Túrkııa, Gúrjistan, Ózbekstan sııaqty elderdiń konstıtýtsııalarynda qarjy júıesine qatysty normalar kórsetilgen. Al Ázerbaıjan, Armenııa, Qyrǵyzstannyń Ata zańynda aqsha birligi naqty belgilengen, — deıdi depýtat.
Budan buryn «Qazaqstan zańgerler odaǵy» Konstıtýtsııa jobasyn búkilhalyqtyq referendýmǵa shyǵarý usynysyn qoldaǵanyn jazǵanbyz.