Aıdarbek Qojanazarov: Jańa Konstıtýtsııa jobasy — qoǵam qatysýymen ázirlengen derbes sheshim
ASTANA. KAZINFORM — Májilis depýtaty Aıdarbek Qojanazarov jańa Konstıtýtsııa jobasy Qazaqstannyń tereń ózgerister kezeńindegi memlekettik damý baǵytyn aıqyndaıtyn strategııalyq qujat ekenin málimdedi.
Depýtattyń aıtýynsha, konstıtýtsııalyq reforma ulttyq damý modeline, basqarý júıesine jáne qoǵamnyń jańa suranystaryna jaýap retinde ázirlenip otyr. Bul joly Konstıtýtsııa jobasyn daıyndaý burynǵy tájirıbeden ózgeshe formatta uıymdastyrylyp, ashyqtyq pen keń qoǵamdyq qatysý qaǵıdattaryna negizdelgen.
— Komıssııa jumysyna óńir ókilderi, sarapshylar jáne azamattyq qoǵam ınstıtýttary tartyldy. Tsıfrlyq platformalar arqyly myńdaǵan usynys qabyldanyp, olar júıeli túrde qaraldy. Mundaı tásil qoǵamnyń sheshim qabyldaý úderisine qatysýyn keńeıtip, memlekettik ınstıtýttarǵa degen senimdi arttyrady, — dedi ol Konstıtýtsııalyq reforma jónindegi komıssııanyń otyrysynda.
Onyń sózinshe, usynylǵan joba daıyn úlgilerdi kóshirý emes, halyqaralyq tájirıbeni eskere otyryp qalyptasqan derbes ári egemen sheshim. Qujat qoǵamnyń qundylyqtyq negizin saqtaı otyryp, tarıhı sabaqtastyqty jalǵastyrady jáne jańa syn-qaterlerge jaýap beredi.
Depýtat jańa Konstıtýtsııada adam quqyqtary men qadir-qasıetiniń basymdyǵy kúsheıtilip, halyqtyń egemendiktiń ıesi ári bıliktiń qaınar kózi ekeni naqty bekitiletinin atap ótti. Sonymen qatar táýelsizdik, ýnıtarlyq qurylym jáne aýmaqtyq tutastyq memlekettiliktiń ózgermeıtin negizderi retinde aıqyndalady.
— Konstıtýtsııa bilim, ǵylym, mádenıet jáne ınnovatsııany strategııalyq basymdyq retinde belgileıdi. Bul eldiń resýrstyq modelden adamı kapıtalǵa negizdelgen uzaqmerzimdi damý baǵytyna kóshýin kórsetedi, - deıdi Respublica partııasynyń jetekshisi.
Sonymen birge tsıfrlyq transformatsııa jaǵdaıynda azamattardyń tsıfrlyq keńistiktegi quqyqtaryn qorǵaý, derbes derekterdiń qaýipsizdigin qamtamasyz etý normalary alǵash ret konstıtýtsııalyq deńgeıde bekitiledi. Memlekettik basqarý arhıtektýrasynda da ózgerister qarastyrylyp, bir palataly parlament — Quryltaı qurý, onyń baqylaý fýnktsııalaryn kúsheıtý jáne saıası partııalardyń jaýapkershiligin arttyrý kózdelgen.
Depýtattyń aıtýynsha, jańa Konstıtýtsııa azamattardyń quqyqtyq kepildikterin keńeıtip, ádil sot tóreliginiń qosymsha tetikterin engizedi, advokatýranyń erekshe rólin aıqyndaıdy jáne zııatkerlik menshikti qorǵaýdy kúsheıtedi.
— Usynylyp otyrǵan ózgerister burynǵy tájirıbemen sabaqtastyqty saqtaı otyryp, memlekettik júıeni jańǵyrtýǵa múmkindik beredi. Jańa Konstıtýtsııa — uzaqmerzimdi ınstıtýtsıonaldyq damýǵa baǵyttalǵan strategııalyq qujat ári kúshti, ádil jáne turaqty Qazaqstannyń negizi, — dedi Aıdarbek Qojanazarov.
Aıta keteıik, Kazinform agenttiginiń Telegram arnasynda osy otyrystyń mátin translıatsııasy berilip jatyr.