Aıdarbek Qojanazarov: Úkimet byltyr durys josparlasa, bıyl kartop qymbattamaıtyn edi

ASTANA. KAZINFORM — Májilis depýtaty Aıdarbek Qojanazarov elde kartop baǵasynyń kúrt ósýin Úkimettiń byltyrǵy qatelikterimen baılanystyrady.

Salany memlekettik qoldaý máselesine arnalǵan jıynnan keıin jýrnalıst saýalyna bergen jaýabynda depýtat osyndaı oı aıtty.

— Byltyr biz kartop eksportyna shekteý qoıǵandyqtan, 2024 jyly sharýalar kartop egýdi 30-40 paıyzǵa deıin qysqartyp tastady. Sol sebepten kúzde qazyp alǵan ónimniń mólsheri úırenshikti mólsherge jetpeı qaldy. Sondyqtan suranys mólsheri qolda bar kartoptyń mólsherine qaraǵanda edáýir kóp. Munyń aty — defıtsıt. Sol sebepten kartop baǵasy ósip otyr, — deıdi Aıdarbek Qojanazarov.

Depýtat saýatty jospar bolǵanda bıyl kartop bulaısha qymbattamaıtyn edi dep esepteıdi. 

— Bul jerde másele jospardyń joqtyǵynda. Nege sol kezde shekteý qoıdy. Sebebi uzaq merzimge arnalǵan kózqaras, josparlaý joq. Endigi jyly qansha egemiz, ishki qajettilikti tolyqqandy qamtamasyz ete almaı qalyp júrmeımiz be degendi oılasa, bulaı bolmaýshy edi, — dedi ol.

Aıdarbek Qojanazarov Aýyl sharýashylyǵy mınıstrligi men Saýda jáne ıntegratsııa mınıstrlikteri baǵa saıasatyn oılaǵanda sharýalardyń jaǵdaıyn, sharýalardyń jaǵdaıyn oılaǵanda baǵa saıasatyn umytyp ketedi dep esepteıdi.

— Teńgerimdi jospar bolý kerek. Jospar bolmasa, keler jyly ne bolatynyn boljaý da qıyn. Bul jolǵy eksportqa qoıylǵan shekteý erteń naryqqa qalaı áser etetinin de vedomstvolardyń naqty jospary joq bolǵandyqtan túsiný qıyn. Bıyl baǵa biraz ósti. Bul sharýalarǵa «taǵy bir jyl egip kóreıik» degen ynta týǵyzýy múmkin. ıAǵnı, bıyl ekken mólsherdi kishkene ulǵaıtady. Sondyqtan keler jyly baǵa ortasha deńgeıge túsedi dep oılaımyn, — deıdi Májilis depýtaty.

Eske salsaq, apta buryn elde kartop baǵasy 59 paıyz ósip, ony ózge elderge eksporttaýǵa 6 aıǵa shekteý qoıylǵan edi.