Aıdarbek Qojanazarov: Úkimetke ekinshi múmkindik beremiz – 6 aı

ASTANA. QazAqparat – «Respublica» partııasynyń kóshbasshysy Aıdarbek Qojanazarov Premer-Mınıstr kandıdatýrasyna daýys berý kezindegi fraktsııa ustanymyn túsindirdi, dep habarlaıdy QazAqparat tilshisi.

Aıtýynsha, qazirgi Úkimetke múmkindik berip, aldyna qoıylǵan mindetti qalaı júzege asyratynyn qaraý kerek.

«Biz eki aıdyń ishinde Úkimettiń aldyna qoıylǵan syn-tegeýirinderge jaýap bere alarlyqtaı kadrlyq rezerv jasaqtaıtyn jaǵdaıda emespiz. Úkimetke ekinshi múmkindik beremiz – 6 aı. Eger Úkimet sol baıaǵy tıimsiz ári ıkemsiz bolyp qala bergenin kórsek, onda ózimizdiń kadrlyq rezervten adamdardy ilgeriletetin bolamyz», - dedi ol Májilistiń jalpy otyrysynan keıin BAQ ókilderiniń saýalyna oraı.

Sonymen qatar, partııa kóshbasshysy vedomstvolardyń tartynshaqtyǵyn da synap ótti.

«Bizdiń mınıstrlikter qandaı da bir túzetýler engizý úshin Prezıdenttiń Joldaýyna sol túzetýlerdi engizýge tyrysady. Sodan keıin ǵana naqty is-qımyl bastalady», - dep atap ótti Aıdarbek Qojanazarov.