Aıdarbek Qojanazarov Kókpar federatsııasynyń prezıdenti bolyp saılandy
ASTANA. KAZINFORM – Elimizde Kókpar federatsııasynyń jańa prezıdenti saılandy. Baýyrjan Ábdirashıtulynyń ornyna Májilis depýtaty Aıdarbek Qojanazarov keldi.
Búgin Respýblıkalyq «Kókpar» federatsııasynyń kezekten tys konferentsııasy ótti. Otyrys barysynda federatsııanyń ótken jylǵa qorytyndysy tyńdalyp, bıylǵa jospary aıtylady. Sonymen qatar Ulttyq sport qaýymdastyǵynyń prezıdenti Erkebulan Іlııasov Kókpar federatsııasynyń jańa Prezıdentin tańdaý týraly usynys bildirip, bul laýazymǵa Aıdarbek Qojanazarov saılandy.
– Baýyrjan Ábdirashıtuly óz erkimen quzyrettiligin toqtatty. Salanyń damýyna qosqan úlesińiz úshin alǵys bildiremin. Bul qyzmetke qazirgi Májilis depýtaty, Kókpar Federatsııasynyń qurmetti Prezıdenti, ulttyq sporttyń basy-qasynda júrgen azamat Aıdarbek Qojanazarov saılandy. Kópshiligimiz jaqsy tanımyz, ol Qostanaıda kókpardy damytyp, úlken deńgeıge kótere aldy. Sizdiń basqarýyńyzda federatsııa da damı túsedi degen senimdemin, - dedi Erkebulan Іlııasov.
Kókpar federatsııasynyń jańa Prezıdenti kópshilikke senim bildirgeni úshin alǵys aıtyp, salanyń damýy úshin qandaı sharalardy qolǵa alatynyn aıtty.
– Kókpar sportynan «Qazaqstan Kókpar Lıgasyn» bastaımyz. Júlde qory 25 mln teńgeni quraıdy. Qazir basqa sporttyq sharalar kestesin qarap, lıgany ótkizý ýaqytyn naqtylaımyz. Sonymen qatar kókpardy aımaqtarda keńinen nasıhattaý úshin barlyq oblysta federatsııa fılıaldaryn ashyp, marketıng, jarnama jaǵyn kúsheıtemiz. Chempıonattyń júlde qoryn kóbeıtip, jaqsy oıyn kórsetken komandalarǵa yntalandyrý syılyǵyn qarastyramyz, - dep atap ótti Aıdarbek Qojanazarov.
Sonymen qatar ol chempıonat barysynda jekelegen sportshylar men jaqsy daıyndalǵan attarǵa belgili bir nomınatsııalar arqyly yntalandyrý berý kózdelip otyrǵanyn atap ótti. Salym salǵan at ıesine de júlde qorynyń belgili bir paıyzyn berý qarastyrylǵan. Bul at ıesi kókparshylarǵa atyn bermeı qoıatyn jaǵdaılardyń aldyn alý úshin jasalyp otyr.
Konferentsııa qorytyndysynda Kókpar sportynyń búgingi ahýaly talqylanyp, Jastar arasyndaǵy Qazaqstan chempıonatynyń jerebesi ótti.