Aıdar Sháribaevtyń jekpe-jegi 28 qazanǵa aýysty
ASTANA. QazAqparat - Almatylyq kásipqoı boksshy Aıdar Sháribaev 19 qazan kúni AQSh-tyń Atlanta qalasynda kezekti jekpe-jegin ótkizýi kerek bolǵan. Alaıda sońǵy sátte bul kezdesý keıinge shegerildi. Endi Aıdar qazannyń 28-i kúni sharshy alańǵa shyǵady dep kútilýde, dep habarlaıdy Habar24.kz Diamondring.kz. portalyna silteme jasap.
Boks keshi Amerıkanyń Konnektıkýt shtatyna qarasty Mashantaket qalasyndaǵy Foxwoods Resort Casino kesheninde ótedi. 8 raýndtan turatyn bul dáreje kóterý jekpe-jegi Aıdar úshin óte mańyzdy. Osyǵan deıin 6 kezdesý ótkizip, áli jeńilistiń aşy dámin tatyp kórmegen jerlesimiz jeńil salmaqta álem chempıony bolýdy armandaıdy. Bilikti bapker Derık Santos Rosarıonyń qol astynda ter tógip júrgen Aıdar naǵyz babynda ekenin aıtady. Osydan tórt aı buryn muhıt asqan Sháribaev aldyna qoıǵan maqsatyna jetý úshin ter tógip júr.
«Týǵan jerime degen saǵynyshty aýyzben aıtyp jetkizý múmkin emes. Maıamıde júrgen tórt aı ishinde talaı qıyndyqtar bastan ótti. Endi, mine, jekpe-jek jaqyndaǵanda taǵy da ózgerister boldy. Kez kelgen jeńistiń ońaılyqpen kelmeıtinin jaqsy bilemin. Sondyqtan aldyma qoıǵan maqsatyma jetý úshin barlyq qıyndyqqa tózýge daıynmyn», - deıdi Aıdar Sháribaev.
