Aıdar Sháribaevtyń AQSh-taǵy aıqasyna boks juldyzdary kommentator bolady
ASTANA. QazAqparat - Álemdik boks juldyzy Bernard Hopkıns pen AQSh-tyń jetekshi sport jýrnalısteriniń biri Bernardo Ocýna Golden Boy Promotions boks keshin júrgizedi. Onyń aıasynda 12 sáýir kúni Aıdar Sháribaev (7-0,6 KO) 8-shi jekpe-jegin ótkizedi, dep habarlaıdy «SPORTINFORM» SAA Diamond Ring qazaqstandyq promoýterlik kompanııasyna silteme jasap.
Kásipqoı boksta 1988 jyldan 2017 jylǵa deıin 65 aıqas ótkizip, sonyń 55-inde jeńiske jetken jáne ekeýinde teń túsken áıgili Bernard Hopkıns bylǵary qolǵabyn shegege ilgennen keıin, televızııa salasyna bet burǵan. 53 jastaǵy sýperjuldyz 12 sáýir kúni «Golden Boy» promoýterlik ortalyǵynyń uıymdastyrýymen ótetin kásipqoı boks keshinde ESPN juldyzy Bernardo Osýnamen birge ESPN telearnasy arqyly tikeleı efırdi júrgizedi.
Budan bólek, aty ańyzǵa aınalǵan kishi Roı Djons (66-9, 47 KO) Indıodaǵy boks keshiniń qurmetti qonaǵy bolady.
Esterińizge sala keteıik, keshtiń basty aıqasynda meksıkalyq Fransısko Vargas (24-1-2, 17 KO) pen amerıkalyq Rod Salka (24-4, 4 KO) sharshy alańǵa shyǵady. Ekinshi jartylaı jeńil salmaq dárejesinde ótetin bul jekpe-jek 10 raýndqa josparlanyp otyr. Al basty anderkartynda qazaqstandyq Aıdar Sháribaev (7-0, 6KO) amerıkalyq Endrıý Kanchıomen (17-4-2, 13 KO) aıqasyp, ekinshi jartylaı jeńil salmaq dárejesindegi WBA Inter-Continental belbeýin sarapqa salady. Qazaqstandyq jankúıerler bul jekpe-jekterdi 13 sáýir kúni tańerteń «Setanta Qazaqstan» telearnasy arqyly tikeleı efırden tamashalaı alady.
