Aıdar Sharıbaevtyń 29 qazanda kezdesetin qarsylasy anyqtaldy
ASTANA. QazAqparat - Osyǵan deıin habarlanǵanyndaı, jeńil salmaqta óner kórsetetin Diamond Ring komandasynyń múshesi Aıdar Sharıbaev óziniń kásibı bokstaǵy 4-shi kezdesýin ótkizbek, dep habarlaıdy QazAqparat sports.kz saıtyna silteme jasap.
Bul kezdesý de Aıdar úshin óziniń týǵan aımaǵy - Almatyda Qanat Islam-Patrık Alloteı shoýynyń aıasynda 29 qazan kúni «Almaty Arena» sport kesheninde ótedi.
Aıdardyń qarsylasy meksıkalyq «ý» degen laqap atpen belgili Hýan Okýra. Latynamerıkalyq boksshynyń esebinde 18 kezdesý bar. Sońǵy saıysyn 29 jasar boksshy reseılik Aleksandr Podolskııge qarsy ótkizip, upaı sany boıynsha jeńildi.
Aıdar Sharıbaev úshin bul eń alǵashqy kúrdeli synaq bolmaq. Meksıkalyq bylǵary qolǵap sheberleri ońaılyqpen berilmeıtin tabandylyqtarymen tanymal. Osyǵan qaraı Aıdarǵa qarsylasyn nokaýtqa jiberý de ońaıǵa soqpasy anyq. Jalpy, Hýan Okýra tájirıbeli boksshy, meksıkalyq boks stıliniń jarqyn juldyzy.
Degenmen, Sharıbaevtyń da erekshelikteri az emes. Sonyń biri - onyń óte aýyr soqqysy.
Jeńil salmaqtaǵy kezdesý 6 raýndqa eseptelgen.
Osy kúni rıngke Aıdardan basqa Jánibek Álimhanuly, Janqosh Turarov, Rýslan Myrsataev, Alı Ahmedov jáne Aıdos Erbosynuly sııaqty qazaqstandyq boksshylar da óner kórsetedi.
