Aıdar Sháribaev WBA qurlyqaralyq chempıony belbeýi úshin bokstasady
ASTANA. QazAqparat - Búkilálemdik boks qaýymdastyǵy (WBA) qazaqstandyq boksshy Aıdar Sháribaev (7-0, 6 KO) pen amerıkalyq Endrıý Kanchıonyń (17-4-2, 13 KO) tıtýldyq jekpe-jegin belgiledi. Bul týraly búgin elordada Diamond Ring promoýterlik kompanııasy men «QazAqparat» halyqaralyq aqparat agentti arasynda jasalǵan yntymaqtastyq týraly memorandýmǵa qol qoıý kezinde belgili boldy, dep habarlaıdy «SPORTINFORM» SAA.
Diamond Ring boksshysynyń segizinshi aıqasynyń ýaqyty men orny ǵana emes, bolashaq qarsylasy da ózgerdi. Jeńilip kórmegen Qazaqstan ókili 29 jastaǵy amerıkalyq Endrıý Kanchıomen Indıodaǵy (AQSh) Fantasy Springs Casino otel-kazınosynyń arenasynda kúsh synaıdy.
Kanchıo sońǵy ret 2016 jyldyń qyrkúıeginde rıngke shyǵyp, óziniń otandasy Djozef Dıastan (26-0, 14 KO) jeńilgen edi jáne Soltústikamerıkalyq boks federatsııasynyń (NABF) ataǵynan aıyrylǵan bolatyn.
Bul jekpe-jek Sháribaevtyń ekinshi jartylaı jeńil salmaqtaǵy debıýti jáne birinshi tıtýldyq aıqasy. Boksshylar Búkilálemdik boks qaýymdastyǵynyń (WBA) qurlyqaralyq chempıony belbelbeýine talasady.
Budan buryn qazaqstandyq boksshy jeńil salmaqta jeti ret judyryqtasyp, jeńiske jetken (onyń ishinde 6-yn nokaýtpen) edi.
