Aıdar Sháribaev: Men úshin jeńilis degen uǵym joq...
ASTANA. QazAqparat - Qazaqstandyq kásibı boksshy Aıdar Sháribaev AQSh-taǵy alǵashqy jeńilisinen keıin únsizdikke núkte qoıyp, suhbat berdi, dep habarlaıdy «SPORTINFORM» SAA.
- Aıdar, qazirgi ýaqytta Sizdiń fızıkalyq turǵydaǵy jaǵdaıyńyz qalaı?
- Rahmet. Aqyryndap qalypqa kele bastadym.
- Eki raýndtan keıin qarsylastan mundaı serpindi kútpegen sekildisiz...
- Kúttim. Jalpy, men úshin onyń sharshy alańda jetekshilik etýi tosynsyı bolǵan joq. Ol tájirıbeli boksshy. Ózim osynsha álsizbin dep oılamappyn. Bálkim, aıqas aldynda salmaq qýyp, ol úrdisti durys júrgizbegen sekildimin. Al jalpy aıqastyń qorytyndysyn eseptemegende bári de jospar boıynsha júrgizildi.
- Sizdiń oıyńyzsha, Endrıý Kanchıo nelikten basym tústi?
- Bilmeımin. Bálkim, qarsylas óziniń salmaq dárejesinde óner kórsetkeninen bolar. Dese de, men istiń bári qarsylastyń kúshti bolyp shyqqanyna baılanysty boldy dep esepteımin. Bul joly men álsizdik tanyttym.
- Alǵashqy sátsizdikten keıin qandaı qorytyndyǵa keldińiz?
- Shynymdy aıtsam, kóptegen qorytyndy jasadym. Asyǵystyq tanytpaýmen birge shekten tys jaıbasar bolyp ketpeý kerek degen sheshimge keldim. Aıqas qabiletiniń bel ortasyn taba bilý de sheberik. Tehnıkalyq turǵyda biraz oı túıdim. Kóbinese detaldarǵa nazar aýdarý qajettiligin túsindim. Ákem aıtpaqshy: «Usaq kemshilikter joq jerde, iri kemshilikterge oryn joq».
- Endigi kezekte ne josparlap otyrsyz?
- Jospar kóp. Ózimniń basty maqsatym - álem chempıony tıtýlyna qaraı qozǵala beremin. Umtylys ta, entýzıazm da báseńdep qalǵan joq. Shynymdy aıtsam, tipti umtylysym arta tústi. Jatpaı-turmaı eńbektenetin bolamyz. Ózimizdiń bokstan otandyq bapkerlerimizben jumys istegim keledi. Jalpy, men úshin «jeńilis» degen uǵym joq, «sabaq» degen túsinik bar. Bolashaqta kerek bolar kóptegen oı-paıymdardy sanama túıip aldym. Endi alǵa qaraı jyljı beremin.
Eske sala ketsek, osy aıdyń 12-de Indıoda Aıdar Sháribaev (7-1, 6 KO) AQSh ókili Endrıý Kanchıomen (18-4-2, 14 KO) tıtýldyq jekpe-jegin ótkizgen bolatyn. Boksshylar ekinshi jartylaı jeńil salmaqtaǵy WBA InterContinental beldigi úshin kúsh synasqan edi. Jerlesimiz jekpe-jekti qarqyndy bastady. Alaıda úshinshi, besinshi raýndtarda nokdaýnǵa túsip qaldy. Sońǵy onynshy raýndta tóreshi jekpe-jekti toqtatyp, Sháribaevqa tehnıkalyq nokaýt jarııalady. Bul qazaqstandyq bylǵary qolǵap sheberiniń 58,967 kılogramǵa deıingi salmaq sanatyndaǵy debıýti ári kásipqoı bokstaǵy alǵashqy jeńilisi boldy.
Buǵan deıingi 7 kezdesýdiń barlyǵyn da Aıdar jeńispen aıaqtaǵan.
