Aıdar Sháribaev chempıondyq belbeý úshin Amerıkaǵa attandy
ASTANA. QazAqparat - Búgin túnde qazaqstandyq kásipqoı boksshy Aıdar Sháribaev oqý-jattyǵý jıynyn ótkizý úshin Maıamıge attandy, dep habarlaıdy QazAqparat.
Jıyn qorytyndysy boıynsha ol AQSh-ta chempıondyq jekpe-jegin ótkizedi.
Qazaqstandyq boksshynyń chempıondyq úshin aıqasy naýryz aıyna josparlanǵan. Ázirge onyń qarsylasy belgisiz. Degenmen, jeńil salmaq dárejesinde WBA Inter-Continental belbeýine talasady dep kútilýde. Al Maıamıde Sháribaev óziniń jeke bapkeri Osmırı Fernandestiń qaramaǵynda jattyǵady.
Almaty áýejaıy arqyly ushqan Aıdardy dostary men jaqyn týystary shyǵaryp salyp, aldaǵy jekpe-jegine jeńis tiledi.
«2018 jyldan úlken úmit kútemin. Tórt aıqas ótkizsem deımin. Qazir promoýterlerim aınalysyp jatyr. Sol tórteýdiń ekeýi chempıondyq jekpe-jekter bolýy tıis. Osy oraıda WBA Inter-Continental belbeýi kásipqoı bokstaǵy karerama úlken serpin berip, jańa baǵyttar ashady dep oılaımyn. Buıyrtsa, osy joly elge qalaıda chempıondyq ataqpen oralýǵa tyrysamyn, - dedi Diamond Ring tilshisine suhbat bergen Aıdar Sháribaev.
Esterińizge sala keteıik, sońǵy aıqasyn ótken jyldyń qarashasynda kolýmbııalyq Daýlıs Preskotqa qarsy ótkizgen jerlesimiz qarsylasyn birinshi raýndta-aq nokaýtqa túsirgen. Osylaısha, Aıdar Sháribaevtyń enshisinde jeti jekpe-jek bar. Barlyǵynda jeńiske jetip, altaýynda qarsylasyn nokaýtpen utqan.
