Aıdar Sadyrbaev «AMANAT»-tyń Abaı oblystyq fılıalyna tóraǵa bolyp saılandy
SEMEI. KAZINFORM — «AMANAT» partııasy Abaı oblystyq fılıalynyń kezekten tys XІ konferentsııasy ótti. Jıynnyń basynda ashyq daýys berý arqyly oblystyq fılıaldyń jańa tóraǵasy laýazymyna Aıdar Sadyrbaev saılandy.
Іs-sharaǵa «AMANAT» partııasynyń Hatshysy Erjan Jylqybaev, partııanyń oblystyq fılıalynyń músheleri, partııanyń aýmaqtyq fılıaldarynyń tóraǵalary men atqarýshy hatshylary, bastaýysh partııa uıymdarynyń jetekshileri men belsendileri, máslıhattardaǵy fraktsııa jetekshileri jáne «Jastar Rýhy» jastar qanatynyń ókilderi qatysty.
Jıyn barysynda Abaı oblystyq depýtattyq fraktsııasynyń jetekshisi Janaeva Shaǵangúl Aldamjarqyzynyń 2024 jylǵy arnalǵan atqarylǵan jumystary men 2025 jylǵa aldaǵy mindetteri týraly baıandamasy tyńdaldy.
Partııanyń Hatshysy Erjan Jylqybaev talap-tilekterdiń oryndalýyna turaqty jáne sapaly monıtorıng júrgizip, bul máseleni partııa fılıalynyń Saıası keńesi Bıýrosynyń qaraýyna shyǵaryp, BAQ pen áleýmettik jelilerde oryndalǵan talap-tilekterdiń oń sheshilgen keısterin belsendi túrde ilgeriletý kerektigin atap ótti.
«AMANAT» partııasynyń 11 máslıhat depýtatynyń depýtattyq mindetin júıeli túrde oryndamaǵany úshin mandattary qaıtaryldy.
— Barlyq deńgeıdegi máslıhattardaǵy basym oryn da bizge tıesili ekenin jaqsy bilesizder. Qoǵam bizden ádildik pen jaýapkershilik kútedi. Sondyqtan biz halyq senimin aqtamaǵan, óz mindetine nemquraıly qaraǵan birqatar máslıhat depýtattarynyń qyzmetine ádil baǵasyn berdik. Naqty aıtqanda, depýtattyq mindetin júıeli túrde oryndamaǵan 11 depýtattyń mandaty qaıtaryldy, 26 maslıhat depýtatyna «sógis» jarııalandy. Bul — tek jazalaý emes, jaýapkershilikti arttyrýǵa baǵyttalǵan qadam, — dedi ol.
«Jer amanaty» jobasy iske qosylyp, 2,5 jyl ishinde 13,1 mln gektardan astam jer memleketke qaıtaryldy.
— Abaı oblysy boıynsha «Jer Amanaty» komıssııasy ótken jyly 550 myń gektar jerdi memleket menshigine qaıtardy. Munda eskerilýi tıis taǵy bir másele bar. Jerdi qaıtaramyz dep ony adal eńbegimen ıgerip otyrǵan sharýalarǵa qııanat ta, qysym da jasalmaýy tıis. Muny qatań qadaǵalaımyz. Sonymen qatar, jer, jaıylym máselelerin retteý úshin Májilis tarapynan birqatar mańyzdy zań qabyldanǵanyn bilesizder. Máslıhattar jergilikti jerlerde osy zańnyń oryndalýyn baqylaýda ustaýy kerek, — dedi Erjan Jylqybaev.
Sonymen qatar, partııanyń iske asyp jatqan «Qaryzsyz qoǵam» jobasy halyqtyń qarjylyq saýattylyǵyn arttyrýda mańyzdy ról atqaryp, eki jyl ishinde 850 myń azamat joba aıasynda oqýdan ótkendigi de málimdeldi. Abaı oblysy boıynsha 9 myńǵa jýyq adam oqýdan ótti. Atalǵan saladaǵy túıtkilderdi retteý úshin Parlamenttik tyńdaýlar ótkizilip, tıisti zańdardyń qabyldanǵandyǵyn da aıtyp ótti Partııa Hatshysy Erjan Jylqybaev.