Aıdar Mahmetov: MMA-dan ótetin chempıonatta basty qarsylastarymyz - reseılikter
ASTANA. QazAqparat - Elordadaǵy «Dáýlet» sporttyq kesheninde 6-7 qazan kúnderi Búkilálemdik MMA qaýymdastyǵynyń nusqasy boıynsha MMA-dan V álem chempıonaty ótedi, dep habarlaıdy «QazAqparat» HAA tilshisi.
Astanadaǵy sharshy alańda qazaqstandyq sportshylarmen birge Lıvan, Marokko, Reseı, AQSh, Qytaı men Argentına t.s.s elderden 150-den astam sportshy óner kórsetedi.
«Bul joly tolyq jańartylǵan quram óner kórsetedi. Búginde kásibı sharshy alańnyń shańyn qaǵyp júrgenderdiń ishinde saıysqa túsetinder boıynsha Sergeı Morozovty, Shavkat Rahmonovty, Dáýren Ermekovty, Goıtı Dazaevany, Rashıda Dagaevany erekshe atap ótýge bolady. Qazaqstannyń qazirgi quramasynda chempıon ataǵyn jeńip alýǵa Sanjar Ádilovtiń, Mádı Raıhannyń, Zarına Qadyrbaeva men Marııa Agapovanyń (61,2 kg) jaqsy múmkindigi bar. Basty qarsylastarymyz, álbette, reseılikter. Olar mundaı jarysqa myqty mektepten shyńdalyp keledi. Dese de, bizdiń de sportshylarymyzdyń kórseteri bar», - deıdi QR MMA, pankratıon jáne greplıng ulttyq federatsııasynyń qurmetti prezıdenti Aıdar Mahmetov.
Al MMA-dan Qazaqstan quramasynyń bas jattyqtyrýshy AıbekShoqpytovtyń aıtýyna qaraǵanda sportshylar erekshe daıyndyqtan ótken.
«Bizdiń oqý-jattyǵý jıynymyz Aqtóbe qalasynda ótti. Barlyq sportshylar jeńiske dámeli. Sportshylarymyz Astanadaǵy álem chempıonatynda jaqsy nátıje kórsetetinine senimdimin. Týǵan jerimizde óner kórsetemiz. Bul bizge erekshe kúsh-jiger, qoldaý beredi», - deıdi Aıbek Shoqpytov.
MMA boıynsha V álem chempıonatyn MMA, pankratıon jáne grepplıng ulttyq federatsııasy Astana qalasy ákimdiginiń, QR Aqparat jáne kommýnıkatsııa mınıstrliginiń, «Samuryq-Qazyna» AQ qoldaýymen uıymdastyryp otyr. Chempıonatty tikeleı efırden otandyq «QAZSPORT» telearnasy kórsetedi. Álemniń túkpir-túkpirindegi kórermender aqtyq syndardy telearnanyń saıtynan tamashalaı alady. Chempıonat týraly arnaıy sıýjet «Euronews» telearnasynda shyǵady. Bul óz kezeginde álemdegi áýesqoı MMA-ny kópshilikke pash etýge jańa serpin bermek.
