Aıdana Medenova ana boldy
ASTANA. QazAqparat - "Keshıý" tobynyń burynǵy ánshisi Aıdana Medenova ana atandy. Ol óziniń ómirindegi mańyzdy oqıǵany áleýmettik jelidegi paraqshasynda búgin jarııalady.
«Qurmetti meniń tyńdarmandarym! Men sizdermen ómirimniń eń qýanyshty sátimen bóliskim keledi! Ol, árıne, árbir qyz balanyń armandaǵanyndaı, ómirge sábı ákelý, ana bolý baqyty. Allanyń qalaýymen bizdiń otbasymyzǵa, januıamyzǵa kishkentaı búldirshin, tula boıy tuńǵyshymyz Ámına atty qyzymyz dúnıege keldi!» - dep jazdy.
Ánshiniń sózine qaraǵanda kishkentaı Ámınanyń týǵanyna qyryq kún tolǵan kórinedi. Ol ómirindegi mańyzdy oqıǵany kópshilikke qazaqtyń yrym-tyıymyna súıenip, «qol-aıaǵyn baýyryna alǵannan keıin» aıtýdy jón sanapty.
Eske salaı keteıik, ústimizdegi jyldyń naýryz aıynda ánshi, dızaıner, Aıdana Medenova "Indıgo FM" tobynyń dırektory Álisher Nurjanovqa uzatylǵan bolatyn.
