«Aıdaǵany bes eshki, ysqyryǵy jer jaratynnyń» bári patrıot emes – Memleket basshysy
ASTANA. KAZINFORM – Naǵyz otanshyl azamat úndemeı júrip, úlken is bitiredi. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Menińshe, otanshyldyq degen uly sezim jyltyraq sózben, jalǵan áreketpen baǵalanbaýǵa tıis. Naǵyz otanshyl azamat jurttyń aldynda keýdesin soǵyp kópirmeıdi, etegi jasqa tolyp eńiremeıdi, ońdy-soldy suhbat berip dilmársimeıdi. Úndemeı júrip, úlken is bitiredi. «Aıdaǵany bes eshki, ysqyryǵy jer jaratynnyń» bári patrıot emes. Otanshyl bolý – týǵan elińniń, otbasyńnyń ıgiligi úshin aıanbaı eńbek etý degen sóz. Qoqysty jınaý, tal egý, tabıǵatty aıalaý, úlkenge qurmet, kishige izet kórsetý de – otanshyldyqtyń belgisi, - dedi Qasym-Jomart Toqaev.
Memleket basshysy aımaqtarǵa issaparmen barǵanda ınjenerlermen, jumysshylarmen, muǵalimdermen, dárigerlermen, sharýalarmen, áskerı qyzmetshilermen, mádenıet qaıratkerlerimen kezdesetinin atap ótti.
- Olardyń bári – súıikti Otanymyzdyń naǵyz patrıottary. Otan otbasyńnan, aýlańnan, kósheńnen bastalady. Sondyqtan, aınalańdy aıalap, tabıǵatty taza ustaý kerek. Álemde mýltıkýltýralızmdi qoldap, ultaralyq jáne dinaralyq tatýlyqty jaqtaıtyndar men ózin naǵyz patrıot sanaıtyn radıkaldy ultshyl top ókilderi arasynda qaqtyǵys bolyp jatyr. Menińshe, eki jaqtyń da ustanymy ushqary. Sebebi Azııada baǵzy zamannan beri zań men tártipke baǵynyp, bereke-birlikte, tatý-tátti ómir súrýdiń «úlgili úılesimi» bar, - dedi Prezıdent.
Qasym-Jomart Toqaev buǵan deıin qoǵamdyq ómirdiń «Birligimiz – áralýandyqta» dep atalatyn mańyzdy qaǵıdatyn jarııalaǵanyn eske saldy.
- Bul azamattarymyz birin-biri qurmettep, sabyr saqtap, tártipti bolýy qajet degendi bildiredi. Taǵy da qaıtalap aıtaıyn: Qazaqstan úshin «Zań men Tártip», qolmen istegendi moıynmen kóterý qaǵıdattary aıryqsha mańyzdy. Áıtpese, josparlarymyzdy oryndap, maqsattarymyzǵa jetý ekitalaı bolmaq, - dedi Memleket basshysy.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.