Aıchı - Nagoıadaǵy jazǵy Azııa oıyndarynyń bastalýyna bir jyl qaldy
ASTANA.KAZINFORM – XX jazǵy Azııa oıyndary jáne V Azııa para oıyndarynyń bastalýyna bir jyl ýaqyt qaldy.
Uıymdastyrý komıtetiniń resmı saıtyndaǵy aqparatqa sáıkes, Aıchı-Nagoıadaǵy Azııa jáne Azııa para oıyndaryn uıymdastyrý komıteti, qabyldaýshy qalamen birlesip, Azııa oıyndary men Azııa para oıyndaryna bir jyl qalýyna baılanysty saltanatty shara ótkizedi.
Aıta keterligi, is-shara Japonııada 20 qyrkúıekte bastalyp, 26 qazanǵa deıin jalǵasady. Al basty sharany 23 qyrkúıek kúni Nagoıa telemunarasynda (Chubu Electric MIRAI TOWER) ótkizý josparlanǵan. Onda keri sanaý sharasy men mádenı qoıylymdar ótkizilip, jazǵy Azııa oıyndary keńinen násıhattalady.
Eske sala ketsek, 2026 jyldyń 19 qyrkúıegi men 4 qazany aralyǵynda Japonııanyń Aıchı prefektýrasy men Nagoıa qalasynda XX jazǵy Azııa oıyndary jáne V Azııa para oıyndary ótedi. Jarysty uıymdastyrýshylar — Azııa Olımpıadalyq keńesi (AOK) jáne Azıada uıymdastyrý komıteti AINAGOC. Oıyndardyń urany — Imagine One Asia («Birtutas Azııany elestet»).
2016 jyldyń 4 qańtarynda Aıchı prefektýrasynyń gýbernatory Hıdeakı Omýra baspasóz máslıhatynda HH Azııa oıyndaryn ótkizýge ótinim berý ıdeıasyn usyndy jáne Nagoıa qalasymen birlesip ótkizý múmkindigin talqylady. 11 mamyrda Aıchı prefektýrasy men Nagoıa qalasy birlesken ótinimderin jarııalady.
2016 jyldyń 5 qyrkúıeginde Nagoıa qalasy qarjylandyrý máselelerine baılanysty Azııa oıyndaryn qabyldaý usynysynan bas tartty. Kelissózderden keıin Aıchı prefektýrasy men Nagoıa qalasy 2:1 qarjylandyrý bólinisine kelisimge kelip, birlesken ótinimdi rastady.
2016 jyly 25 qyrkúıekte Vetnamnyń Danang qalasynda ótken Azııa Olımpıadalyq Keńesiniń 35-shi Bas Assambleıasy Japonııanyń Aıchı prefektýrasy men Nagoıa qalasyn 2026 jylǵy Azııa oıyndaryn ótkizýge jalǵyz úmitker qala retinde bekitti.
Nagoıa Azııa oıyndary ótkiziletin, úshinshi Japon qalasy. Aıta keteıik, 1958-shi jyly Azııa oıyndary Tokıoda ótse, 1994 jyly Hırosımada uıymdastyryldy.
Osyǵan deıin habarlaǵanymyzdaı, aralas jekpe-jek (MMA) sporty 2026 jylǵy jazǵy Azııa oıyndarynyń baǵdarlamasyna kirdi.