«Aıbyn» jıynyna qatysýshylar robottar men ózdiginen ushatyn apparattar jasady (FOTO)

ASTANA. QazAqparat - Bıylǵy jyly «Aıbyn» ekinshi respýblıkalyq áskerı-patrıottyq jastar jıynyn ótkizý kezinde qatysýshylardyń zııatkerler tobyna erekshe nazar aýdaryldy. Sonymen qatar, «Qazaqstan Injınırıng» UQ» AQ uıymdastyrýymen alǵash ret «Meniń robotym» baıqaýy ótti, dep habarlaıdy QR Qorǵanys mınıstrliginiń baspasóz qyzmeti.

Bul baıqaý barysynda ár komanda robot pen robottalǵan júıeniń úlgilerin kórsetti. Kórmede 30-dan asa robot ónimderi kórsetildi. Olardyń ishinde, mına izdegish robottar, ózdiginen ushatyn apparattarynan barlaýshylar, áskerı-áýe barlaýyna arnalǵan kvadrokopterler. Atalǵan robottar kórermender aldyndaǵy tikeleı efırde óz múmkindikteri men qyzmetterin kórsetti.

Kórsetilgen robottardyń barlyǵy jınaý kúrdeliligi, júktelgen mindetti oryndaýy jáne paıdaly jumysy jaǵynan baǵalandy. Ár sanat boıynsha naqty upaı jazyldy. Upaı sany boıynsha jeńimpaz anyqtaldy.

Sonymen qatar «Meniń ushqyshsyz ushý apparatym» baıqaýy kezinde qatysýshylar óz aralarynda jarysty. Áýe keńistiginde drondy uzaq ustap tura alǵan qatysýshy baıqaýdyń kelesi kezeńine joldama aldy. Osylaısha, olardyń ishinen úzdik ondyq irikteldi. Nusqaýshylar drondarmen qalaı jumys jasaý kerektigin úıretti.

Jarysqa qatysýshylar baıqaý bastalar aldynda apparattardy basqarý úshin tájirıbe jınaqtady. Kórermender úlken ekrannan tikeleı efırde ózderiniń súıikti komandalarynyń jeńisterin baqylady. Atalǵan synaq túri barysynda drondar túrli kedergilerden ushty.

Synaqtyń nátıjesinde drony qulamaı barlyq kedergilerden ótken jeńimpazdar úshtigi anyqtaldy. Saltanatty jabylý rásimi kezinde qorǵanys vedomstvasynyń basshysy Imanǵalı Tasmaǵambetov «Qazaqstan Injınırıng» UQ» AQ ótkizip otyrǵan robot tehnıkalary men ushqyshsyz ushý apparatarynyń kórmesin aralady.  Kórme aıasynda ár qatysýshy óz robot óniminiń qurastyrý kúrdeliligin sıpattap qana qoımaı, sonymen qosa onyń múmkindikteri men qyzmetterin de kórsetti. Kórermender aldynda ushqyshsyz ushý apparattarynyń kórsetilimi ótti.

QR birneshe márte chempıondary jáne halyqaralyq jarystardyń jeńimpazdary ushaqtar men tikushaqtar úlgilerinde ushýdy kórsetti. «Meniń robotym» baıqaýynda Ál-Farabı atyndaǵy Qazaq ulttyq ýnıversıteti áskerı kafedrasynyń stýdenti Dastan Rahatov, al «Meniń ushqyshsyz ushý apparatym» baıqaýynda «Arystan» mamandandyrylǵan lıtseıiniń tárbıelenýshisi Qaısar Berdiǵulov jeńimpaz atanǵandy.