«Aıbyn» halyqaralyq jastar jıynynyń alǵashqy jeńimpazdary anyqtaldy
Qorǵanys mınıstrliginiń málimetine súıensek, Smart sarbaz-2023 ónertapqyshtar baıqaýynda jas baǵdarlamashylar qazylar alqasyna ózderiniń IT-ázirlemeleri men áskerı baǵyttaǵy tehnıkalyq sheshimderin usyndy.
Taldyqorǵan qalasyndaǵy Desanttyq-shabýyldaý áskerleriniń «Jas desantshylar» áskerı-patrıottyq klýbynyń tárbıelenýshisi Ádilet Ádilhan adamdy qaýipsiz jerge evakýatsııalaı alatyn robot-qutqarýshyny tanystyrdy.
«Robotqa ornatylǵan kamera arqyly jábirlenýshini tabýǵa jáne ony tótenshe jaǵdaıda nemese urys alańynan alyp shyǵarýǵa bolady», – dedi jas ónertapqysh.
Nátıjesinde «Jas desantshylar» Qarýly kúshterdiń, basqa da áskerler men áskerı quralymdardyń áskerı-patrıottyq klýbtary arasynda Smart Sarbaz-2023 baıqaýynda birinshi oryndy ıelendi.
Óńirlik qatysýshylar arasynda Abaı oblysynyń «Abaı qyrandary» komandasy jeńiske jetti. Qorǵanys mınıstrligi oqý oryndarynyń komandalary arasyndaǵy jarysta Shymkent qalasyndaǵy «Jas ulan» respýblıkalyq mektebiniń tárbıelenýshileri úzdik atandy.
«Aıbyn daryny» zııatkerlik oıynynda uıymdastyrýshylar balalardyń erýdıtsııasy men tapqyrlyǵyn tekserdi. Qatysýshylar úshin aýdıo jáne beıne suraqtardan, testerden, rebýstardan jáne logıkalyq tapsyrmalardan turatyn vıktorına daıyndaldy.
30 suraqtyń 22-sine «Jetisý tarlandary» komandasy durys jaýap berip, óńirler arasynda birinshi oryn aldy.
Saǵadat Nurmaǵambetov atyndaǵy Qorǵanys mınıstrligi áskerı kolledjiniń ókilderi de ózderin jaqsy kórsetti. 20 suraqqa durys jaýap bere otyryp, olar oqý oryndary arasynda zııatkerlik oıynnyń jeńimpazy atandy.
Qarýly kúshterdiń, basqa da áskerler men áskerı quralymdardyń úsh áskerı-sporttyq klýby árqaısysy 19 upaıdan aldy. Olardyń barlyǵyna birinshi oryn berildi. Olar - «Ońtústik» óńirlik qolbasshylyǵynyń «Patrıot», Qarýly kúshter Qarý-jaraq bastyǵy basqarmasynyń «Saǵadat» jáne Tótenshe jaǵdaılar mınıstrliginiń «Jas ulan» komandalary.
«Aıbyn daryny» baıqaýyna Ázerbaıjannan 16 ball jınaǵan komanda da qatysty.
Jarystar jalǵasyp jatyr. Áskerı-patrıottyq jıyn baǵdarlamasynda barlyǵy 11 konkýrs bar. Alda «Kúshimiz birlikte» áskerı-dalalyq taktıkalyq oıyndary, áskerı-sporttyq jáne áskerı-qoldanbaly jarystar, sondaı-aq áskerılendirilgen estafeta saıysy ótedi.
Qaraǵandy oblysynyń «Spassk» oqý ortalyǵynda «Aıbyn» IX halyqaralyq áskerı-patrıottyq jastar jıyny bastalǵanyn buǵan deıin habarlaǵan bolatynbyz. Oǵan 43 komandaǵa toptasqan 700-den astam jasóspirim men oqýshylar qatysyp jatyr. Baıqaýǵa qatysatyn jas sanaty – 14-17 jas.
