«Aıboz» ulttyq ádebı syılyǵyna ótinim qabyldaý jalǵasyp jatyr

ASTANA. KAZINFORM –  Ulttyq ádebı syılyq otandyq qalamgerlerdi memlekettik qoldaý jáne qazaq ádebıetiniń damýyna yqpal etý maqsatynda ótkiziledi.

Mádenıet jáne aqparat mınıstrligi málimetinshe, bıyl tórtinshi ret uıymdastyrylatyn Ulttyq syılyqqa «Úzdik proza», «Úzdik poezııa», «Úzdik dramatýrgııa», «Úzdik ádebı aýdarma», «Úzdik balalar ádebıeti», «Úzdik ádebı syn», «Úzdik komıks» nomınatsııalary boıynsha buryn jarııalanbaǵan týyndylar qabyldanady.

Baıqaýǵa otandyq jazýshylar qatysa alady jáne úmitkerlerdiń jas ereksheligine shekteý joq.

Ádebı syılyqtyń jalpy júlde qory – 35 mln teńge. Ár nomınatsııaǵa 5 mln teńgeden beriledi.

Ótinim 2025 jylǵy 1 qyrkúıekke deıin www.aiboz.kz saıty arqyly joldanýy tıis. Ulttyq ádebı syılyq jyl sońynda tabystalady. Tolyq aqparatty saıttan bile alasyzdar.

Aıta keteıik, buǵan deıin Qazaqstan Jazýshylar Odaǵy men Qazaqstan Ulttyq Injenerlik Akademııasy birlese otyryp «Eńbek adamy – 2025» baıqaýyn ótkizetinin habarlady.